Света же во тму прилагати не тщуся и сладкое горко не прозываю. А се ли убо светъ или сладко, еже рабомъ владети? А се ли тма и горко, еже от Бога данному государю владети, о немже многа слова пространнейше напреди изъявленна? (...)

О провинении же и прогневании подовластныхъ нашихъ перед нами. Доселе русские владатели не истязуемы были ни от кого, но волны были подовластныхъ своихъ жаловати и казнити, а не судилися с ними ни перед кемъ; аще же и подобаетъ рещи о винахъ ихъ, ино выше реченно есть. (...)

А еже писалъ еси, что бутто те предстатели прегордые царства разоряли и подручны намъ ихъ во всемъ сотворили, у нихъже прежде в работе были праотцы ваши, — се убо разумно есть, еже едино царство Казанское; от Дажитархани[141] же, неже близ вашия мысли было, не точию дело бранно. И еже о сей храбрости свыше начну обличати безумие. Како убо, гордостию дмяся, хвалишися! Како убо прародителемъ вашимъ и отцомъ вашимъ и дядемъ, в какове разуме и храбрости суще и помысла попечения, яко вся ваша храбрость и мудрость ни къ единому ихъ сонному видению подобно, и такие храбрые и мудрые люди, никемъже понуждаеми, но своимъ хотениемъ и бранной храбрости хотимыя, не якоже вы, еже понуждаеми на рать и о семъ скорбяще; и такие храбрые тринадесят летъ до нашего возраста не могоша от варваръ христианъ защитити? По апостолу Павлу реку[142]: быхъ вамъ подобенъ безумиемъ хваляся, понеже вы мя понудисте, власть бо приемлете, безумнии, аще кто вы поедаетъ, аще кто в лице биетъ, аще кто величится; по досажению глаголю. Всемъ убо явлена суть, какова тогда злая пострадаша от варваръ православнии, — от Крыма и от Казани: до полуземли пусто бяше. И егда начало восприяхомъ з Божиею помощию, еже брани на варвары, егда первое посылахомъ на Казанскую землю воеводу своего, князя Семена Ивановича Микулинсково[143] с товарыщи, како вы все глаголали есте, яко мы в опале своей послали, казнити его хотя, а не своего для дела. Ино се ли храбрость, еже служба ставити в опалу? И тако ли покаряти прегордые царства? Та же сколко хожения ни бывало в Казанскую землю, когда не с понуждениемъ хотения ходисте? Но всегда аки на бедное хождение ходисте! Егда же Богъ милосердие свое яви намъ, и тотъ родъ варварский християнству покори, и тогда како вы не хотесте с нами воевати на варвары, яко боле пятинадесятъ тысящъ вашего ради нехотения тогда с нами не быша.[144] И тако ли прегордые царства разоряете, еже народъ безумными глаголы наущати и от брани отвращати, подобно Янушу Угорскому?[145] Такоже и в тамошнемъ пребывании всегда развращенная советовасте, и егда запасы истопоша, како три дни стоявъ, хотесте восвояси возвратитися! И повсегда не хотесте во мнозе бо пребывании подобна времени ждати, ниже главъ своя щадяще, ниже бранныя победы сматряюще, точию: или победивъ наскоре или побежденнымъ бывшимъ, и скорейши во своя возвратитися. Та же и воины многоподобные возвращения ради скораго остависте, еже последи от сего много пролития крови християнския бысть. Како же убо и в самое взятие града, аще бы не удержалъ васъ, како напрасно хотесте погубити православное воинство, не в подобно время брань начати? Тако же убо по взятии града Божиимъ милосердиемъ, вы же убо вместо строения на грабление текосте! Тако ли убо прегордые царства разоряти, еже убо ты, безумиемъ дмяся, хвалишися? Еже ни единыя похвалы, аще истинно рещи, достойно есть, понеже вся, яко раби, с понужениемъ сотвористе, а не хотениемъ паче же с роптаниемъ. Се убо похвално есть, еже хотениемъ желания брани творити. Подручна же тако царствия сия сотвористе намъ, якоже множае седми летъ меже сихъ царствъ и нашего государствия бранная лютость не преста!

Егда же Алексеева и ваша собацкая власть преста, тогда и та царствия нашему государству во всемъ послушны учинишася, и множае треюдесятъ тысящъ бранныхъ исходитъ в помощъ[146] православию. Тако убо вы прегордые царства разоряли и подручны намъ сотворяли! Такоже и нашъ промыслъ и попечение о православии и тако «супротивенъ разумъ», по твоему злобесовскому умышлению! И сие убо о Казани, о Крыме же и на пустыхъ местехъ, идеже зверие бяху, грады и села устроиша. Что же убо и ваша победа, еже Днепромъ и Дономъ?[147] И колика убо злая истощения и пагуба християномъ содеяшася, супротивнымъ же ни малыя досады! О Иване же Шереметеве[148] что изглаголю? Еже по вашему злосоветию, а не по нашему хотению, случися такая пагуба православному християнству. Се убо такова ваша доброхотная служба, и тако прегордые царства разоряете и подручны сотворяете, якоже выше явихомъ.

О германскихъ же градехъ глаголешъ, яко тщаниемъ разума изменниковъ нашихъ от Бога даны намъ. Но, якоже наученъ еси от отца своего диявола лжею глаголати и писати! Како убо, егда начася брань, еже на германы, тогда посылали есмя слугу своего, царя Шихалея, и боярина своего и воеводу, князя Михаила Василевича Глинсково,[149] с товарыщи германы воевати, и от того времяни от попа Селивестра и от Алексея и от васъ какова отягчения словесная пострадахъ, ихже несть мощно подробну изглаголати! Еже какова скорбная ни сотворися намъ, то вся сия германъ ради случися! Егда же васъ послахомъ на лето на германские грады, — тебе бо тогда сущу въ нашей вотчине, во Пскове, своея ради потребы, а не нашимъ посланиемъ, — множае убо седми посланниковъ послали есмя к боярину нашему и воеводе, ко князю Петру Ивановичю Шуйскому, и к тебе; вы же егда поидосте с малейшими людми, и нашимъ многимъ посланиемъ напоминаниемъ множае пятинадесятъ градовъ взясте.[150] Ино се ли убо тщание разума вашего, еже нашимъ посланиемъ напоминаниемъ грады взясте, а не по своему разуму? Како же убо воспомяну о германскихъ градехъ супротивословия попа Селивестра и Алексия Адашова и всехъ васъ на всяко время, еже бы не ходити бранию, и како убо лукаваго ради напоминание датцкого короля[151] лето цело дасте безлепа фивлянтомъ збиратися! Они же, пришедъ пред зимнимъ временемъ, и сколко тогда народу християнского погубили![152] Се ли тщание изменниковъ нашихъ, да и васъ благо, еже тако народъ християнский погубляти! По томъ же послахомъ васъ с началникомъ вашимъ Алексеемъ и зело со многими людми; вы же едва одинъ Вельянъ взясте,[153] и туто много народу нашего погубисте. Какоже убо тогда от литовские рати детскими страшилы устрашистеся![154] Под Пайду же нашимъ повелениемъ неволею поидосте, и каковъ трудъ воиномъ сотвористе и ничтоже успесте![155] Тако убо тщание разума и тако ли убо претвердые грады германские тщалися утвержати? И аще не бы ваша злобесная претыкания была, и з Божиею помощию уже бы вся Германия была за православиемъ.[156] Та же оттоле литаонский языкъ и готфейский и ина множайшая воздвигосте на православие. Се убо «тщание разума вашего» и тако хотисте утвержати православие?

А всеродно васъ не погубляемъ, а изменникомъ бо везде казнь и опала живетъ: в кою землю поехалъ еси, тамо о семъ пространнейше явленна увеси. За такие ваши послуги, еже выше рехъ, достойны были есте многихъ казней и опалы; но мы еще с милостию вамъ опалу свою чинили, аще бы по твоему достоинству, и ты бы к недругу нашему от насъ не уехалъ, и в такомъ бы еси в далекомъ граде нашемъ не былъ, и утекания было тебе сотворити не возможно, коли бы мы тебе в томъ не верили. И мы, тебе веря, в ту свою вотчину послали, и ты такъ собацкимъ обычаемъ измену свою учинилъ.

Безсмертенъ же быти не мнюся, понеже смерть адамский грехъ, общедателный долгъ всемъ человекомъ; аще бо и перфиру ношу, но обаче вемъ се, яко по всему немощию подобно всемъ человекомъ обложенъ есмь по естеству, а не яко же вы мудръствуете, выше естества велите быти ми, от ереси же всякой. (...)

Гонения же аще на людей воскладаете: вы ли убо с попомъ и с Алексеемъ не гонили? Како убо епископа коломенского Феодосия,[157] намъ советна, народу града Коломны повелесте камениемъ побити? И его Богъ ублюде, и вы его со престола согнали. Что же о казначее нашемъ Миките Афонасиевиче?[158] Про что животъ напрасно разграбисте, самого же в заточение много летъ в далныхъ странахъ во алчбе и наготе держали есте? И аще убо вся гонения ваша исчести кто доволенъ за множество ихъ, церковныхъ же и мирскихъ! Хто мало намъ принесетъ послушание, техъ всехъ гонисте. (...)

Зла же гонения безлепа от мене не приялъ еси, и бедъ и напастей на тебе не подвигли есмя; а кое наказание малое бывало на тебе, ино то за твое преступление, понеже согласился еси с нашими изменники. А лжей и изменъ, ихже не сотворилъ еси, на тебя не взваживали есмя; а которые свои преступки делалъ, и мы по темъ твоимъ винамъ по томъ и наказание тебе чинили. Аще ты нашихъ опалъ, за множество ихъ, не можеши изрещи, како же убо вся вселенная исписати можетъ вашихъ изменъ и утеснений, земскихъ и особныхъ, еже вы злобесовскимъ умышлениемъ сотвористе на мя? (...) Злую же и непримирителную ненависть кою воздахомъ тебе? Видящи тя отовсюду от юности твоей и во дворении нашемъ, и в синклитстве, и до нынечния твоей измены всячески дышуще на пагубу нашу, и достойныхъ мукъ по твоему злоумию не воздахомъ. Се ли убо зло и непримирителная ненависть, еже видяще тя о главе нашей злая советующа и в какове приближении и чести и многоимстве держахомъ, выше отца твоего. Еже вси ведятъ, в какове чести и богатстве родители твои жили и како убо отецъ твой, князь Михайло, в каковемъ жаловании и в богатстве и чести былъ. Се вси ведятъ, како же пред нимъ ты и сколко у отца твоего началниковъ поселяномъ, колико же у тебя. Отецъ твой былъ князя Михайла Кубенского бояринъ, понеже онъ ему дядя,[159] ты же нашъ — мы тебя сие чести сподобихомъ. Се ли убо не доволно чести и имения и воздания? Всемъ еси былъ лутчи отца своего нашимъ жалованиемъ, а храброваниемъ его хуждьши еси, изменою прешелъ еси. И аще таковъ еси, почему недоволенъ еси? Се ли убо твое благое возлюбление, еже повсегда сети и претыкания намъ поляцалъ еси, конечнее же подобно Иуде на пагубу нашу поучался еси?

И аще кровь твоя, пролитая от иноплеменныхъ за насъ, по твоему безумию, вопиетъ на насъ к Богу, и еже убо не от насъ пролитая, темъ же убо смеху подлежитъ сия; еже убо от иного пролитая и на иного вопиетъ, паче же и должная отечеству сие совершилъ еси, аще бы сего не сотворил еси, то не бы еси былъ християнинъ, но варваръ; и сие к намъ неприлично. Колми же паче наша кровь на васъ вопиетъ к Богу, от васъ самехъ пролитая: не ранами же, ниже кровными потоки, но многими поты, и трудовъ множества от васъ прияхъ и отягчения безлепа, яко по премногу от васъ отяготихомся паче силы! От многаго вашего озлобления и оскорбления и утеснения, вместо крови, много излияшася нашихъ слезъ и воздыхания и стенания сердечная, и от сего бо пречреслие прияхъ, еже убо и конечному люблению не сподобисте мя, еже о царице нашей и о чадехъ нашихъ не поскорбесте со мною. Се убо все на вы вопиетъ к Богу моему; паче вашего безумия, понеже убо иное за православие пролияли есте кровь свою, ина же, желая чести и богатства. И сие убо Богови неприятно есть; паче же удавлению вменяется, еже славы ради умрети. Мое же утеснение — вместо крови пролитыя от васъ самехъ прияхъ всякое оскорбление и озлобление, еже вашимъ злымъ сеяниемъ оскорбления строптиваго жития не престанетъ, се убо наипаче на васъ безпрестани вопиетъ къ Богу! Совесть же свою испыталъ еси не истинно, но лестно, сего ради истинны не обрелъ еси, понеже о единомъ войсце испыталъ еси, а еже убо о нашей главе твоего нечестия, се презрелъ еси; по сему мнишся и неповиненъ быти.

«Победы же пресветлые и одоление преславное» когда сотворилъ еси? Егда убо послахомъ тя въ свою вотчину, в Казань, непослушныхъ намъ повинити,[160] ты же, в повинныхъ место, неповинныхъ к намъ привелъ еси, измену на нихъ возложа, а на нихже послахомъ тя, никоегоже имъ зла сотворилъ еси. Егда же в нашу вотчину, на Тулу, недругъ нашъ приходилъ, крымской царь,[161] и мы тогда васъ послахомъ, оному же устрашившуся и во своя возвратившуся, воеводамъ же его, Ак-магметъ-улану не со многими людми оставшуся; вы же поехасте ясти и пити к воеводе нашему, ко князю Григорию Темкину, и едши, поидосте за ними, они же от васъ отоидоша здравы. Аще убо вы раны многи претерпесте, но обаче победы благи никоеяже сотвористе. Како же убо под градомъ нашимъ Невлемъ пятьюнадесятъ тысящъ четырехъ тысящъ не могосте побити,[162] и не токмо убо победисте, но и сами от нихъ язвлени едва возвратистеся, симъ ничтоже успевшимъ? Се ли убо пресветлая победа и одоление преславно и похвално и честно? Иная же убо не твоей власти бяху — сия убо тебе на похвалу и не вписуется!

А еже убо мало рождьшия своея зрелъ еси и жены своея позналъ еси и отечествия своего осталъ еси, и всегда в далноконныхъ градехъ нашихъ противъ враговъ нашихъ ополчался еси, и претерпевалъ еси естественныя болезни, и ранами учащенъ еси от варварскихъ рукъ в различныхъ бранехъ, и сокрушенно же ранами все тело имеешь, — и сия тебе вся сотворишася тогда, егда вы с попомъ и со Алексеемъ владесте. И аще не годно, почто тако сотворили есте? Аще же творили есте, почто самъ сотворивъ своею властью, на насъ словеса съкладаете? Аще же и мы бы сие сотворили, сие несть дивно, понеже бо сие должно нашему повелению в вашемъ служении быти. И аще бы мужъ браненоносецъ былъ, не бы еси исчиталъ бранные труды, но паче на преднейшея простиралъ ся; аще ли же исчитаеши бранные труды, то сего ради бегунъ явился еси, яко не хотя бранныхъ трудовъ понести, и сего ради покоя требовати похотелъ еси. Сия же твоя худейшая браненоносия намъ ни во что же поставленна есть, еже ведомыя измены твоя и еже претыкания о нашей главе тебе презренна быша, и яко единъ от вернейшихъ слугъ нашихъ былъ еси славою и честию и богатствомъ? И аще бы не тако, то какихъ казней за свою злобу достоинъ былъ еси! И аще бы не было на тебе нашего милосердия, не бы возможно было тебе угонзнути к нашему недругу, толко бы наше гонение тако было, якоже по твоему злобесному разуму писалъ еси. Бранныя же дела твои все намъ ведомы. Не мни мя неразумна суща, ниже разумомъ младенчествующа, яко же началницы ваши, попъ Селивестръ и Алексей Адашовъ, неподобно глаголали. Ниже мните мя детскими страшилы устрашити, якоже прежде того с попомъ Селивестромъ[163] и со Алексеемъ лукавымъ советомъ прелстисте мя, ниже мните, якоже таковая и ныне сотворили. Якоже в притчахъ реченно бысть: «Егоже не можеши няти, не покушайся имати».

Мздовоздателя Бога призываешъ; воистинну то есть всемъ мздовоздатель всякимъ деломъ, благимъ же и злымъ; но токмо подобаетъ человеку разсуждение имети, како и противу какихъ делъ своихъ кто мздовоздаяния приемлетъ? Лице же свое показуеши драго. Кто бо убо и желаетъ таковаго ефиопскаго лица видети? Где же убо кто обрящетъ мужа правдива, иже зыкры очи имуща?[164] Понеже видъ твой и злолукавый твой нравъ исповедуетъ! (...)

О преподобномъ же князе Феодоре Ростиславиче воспомянулъ еси, — сего азъ на судъ желателне приемлю, аще и сродникъ вамъ есть, понеже бо святии видятъ паче по смерти праведне сотворити, и видятъ межи нами и вами яже от начала и до днесь, и то убо праведно разсудятъ. И еже убо нашу царицу Анастасию, вами уподобляемую Евдоксе,[165] како супротиво вашего желателнаго злаго немилосердаго умышления и хотения святый преподобный князь Феодоръ Ростиславичъ, действомъ Святаго Духа, царицу нашу от вратъ смертныхъ воздвигъ?[166] И се убо наипаче явленна есть, яко не вамъ способствуетъ, но намъ, недостойнымъ, милость свою спростираетъ. Такоже и ныне уповаемъ способника его быти намъ паче неже вамъ, понеже «чада Авраамля аще были, то и дела Авраамля бысте творили; можетъ бо Богу и от камени сего воздвигнути чада Аврааму; не вси бо, изшедшии из Авраама, семя Авраамле причитаются, но живущии по вере Авраамове, сии суть семя Авраамле».[167]

Суемудренными же мысльми ничегоже помышляемъ, ни творимъ, на такой ползе и степени ногъ своихъ не утвержаемъ; но, елика наша сила, крепчайша разума испытуемъ бо, на твердей степени утвердивъ ноги своя, стоимъ неподвижно.

Прогнанныхъ же от насъ несть никогоже, разве сами от православия отторгошася. Избиенныя же и заточенныя по своимъ винамъ, якоже выше рехомъ, по тому тако и прияша. (...)

Ни о чесомъ же убо хвалюся в гордости, и никако же убо гордения желаю, понеже убо свое царское содеваю и выше себе ничтоже творю. Паче убо вы гордитеся дмящеся, понеже раби суще святителский санъ и царский восхищаете, учаще, и запрещающе, и повелевающе. На родъ же кристиянский мучителныхъ сосудовъ не умышляемъ, но паче за нихъ желаемъ противо всехъ врагъ ихъ не токмо до крови, но и до смерти пострадати. Подовластныхъ же своихъ благимъ убо благая подаваемъ, злымъ же злая приносятся наказания, не хотя, ни желая, но по нужде, ихъ ради злаго преступления и наказание бывает. (...)

От Кроновыхъ же убо жерцехъ реклъ еси — еже подобно псу лая иль ядъ ехиднинъ отрыгая, сие неподобно писалъ еси: еже убо родителемъ своимъ чадомъ како сицевая неудобствия творити, паче же и намъ, царемъ, разумъ имущимъ, како уклонитися на сие, безлепие творити? Сия убо вся злобеснымъ своимъ собацкимъ умышлениемъ писалъ еси.

А еже свое писание хощеши с собою во гробъ положити, се убо последнее християнство свое отложилъ еси. И еже убо Господу повелевшу еже не противитися злу, ты же убо и обычное, еже и невежда имутъ, конечное прощение отверглъ еси; и по сему же несть подобно и пению над тобою быти.

В нашей же вотчине, в Вифлянской земле, градъ Володимерь[168] недруга нашего Жигимонта короля нарицаеши, — се убо свою злобесную собацкую измену до конца совершаеши. А еже от него надеешися много пожалованъ быти, — се убо подобно есть, понеже убо не хотесте под Божиею десницею власти его быти, и от Бога даннымъ намъ, владыкамъ своимъ, послушнымъ и повиннымъ быти нашего повеления, — но в самоволстве самовластно жити. Сего ради такова и государя себе обрелъ еси, еже по своему злобесному собацкому хотению, еже ничимъже собою владеюща, но паче худейша худейшихъ рабъ суща, понеже от всехъ повелеваемъ есть, а не самъ повелевая. Понеже и утешенъ не можеши быти, понеже тамъ особь кождо о своемъ попечение имея.[169] Кто убо можетъ избавити тя от насилныхъ рукъ и от обидящаго восхитити тя возможетъ, иже сиру и вдовице суду не внемлюще, ихъже вы, желающе на християнство злая, составляете! (...)