ОРИГИНАЛ

Богъ нашъ Троица, иже прежде векъ сый и ныне есть, Отецъ и Сынъ и Святый Духъ, ниже начала имеетъ, ниже конца, о немже живемъ и движемся, имже царие величаются и силнии пишут правду, иже дана бысть единороднаго слова Божия Исусъ Христомъ, Богомъ нашимъ, победоносная хоруговь — крестъ честный, и николи же победима есть, первому во благочестии царю Констянтину[44] и всемъ православнымъ царемъ и содержителемъ православия. Понеже смотрения Божия слова всюду исполняшеся, и божественнымъ слугамъ Божия слова всю вселенную, яко же орли летаниемъ, обтекше, даже искра благочестия доиде и до Росийскаго царствия. Сего убо православия истиннаго Росийскаго царствия самодержавство Божиимъ изволениемъ поченъ от великого князя Владимира, просветившаго Рускую землю святымъ крещениемъ, и великого князя Владимира Мономаха, иже от грекъ высокодостойнейшую честь приимшу,[45] и храбраго великого государя Александра Невского, иже над безбожными немцы велию победу показавшаго, и хваламъ достойнаго великого государя Димитрия,[46] иже за Дономъ над безбожными агаряны велию победу показавшаго, даже и до мстителя неправдамъ, деда нашего, великого государя Иоанна, и закосненнымъ прародителствия землямъ обретателя, блаженыя памяти отца нашего великого государя Василия, даже доиде и до насъ, смиренныхъ, скипетромдержания Росийского царствия. Мы же хвалимъ Бога за премногую его милость, произшедшую на насъ, еже не попусти доселе десницъ нашихъ единоплеменною кровию обагритися, понеже не восхотехомъ ни под кимъ же царства, но Божиимъ изволениемъ и прародителей своих и родителей благословениемъ, яко же родихомся в царствии, тако и воспитахомся и возрастохомъ и воцарихомся Божиимъ велениемъ, и прародителей своих и родителей благословениемъ свое взяхомъ, а чюжаго не восхотехомъ. Сего православнаго истиннаго християнского самодержавства, многими владычествы владеющаго, повеления, нашъ же християнский смиренный ответъ бывшему прежде православнаго истинного християнства и нашего самодержания боярину и советнику и воеводе, ныне же крестопреступнику честнаго и животворящаго креста Господня, и губителю хрестиянскому, и ко врагомъ християнскимъ слагателю, отступшему божественнаго иконнаго поклонения и поправшему вся священная повеления, и святые храмы разорившему, осквернившему и поправшему священныя сосуды и образы, яко же Исавръ, Гноетезный, Арменинъ,[47] и симъ всимъ соединителю, — князю Андрею Михайловичю Курбскому, восхотевшему своимъ изменнымъ обычаемъ быти ярославскому владыце,[48] ведомо да есть.

Почто, о княже, аще мнишися благочестие имети, единородную свою душу отверглъ еси? Что же даси на ней измену в день Страшнаго суда? Аще и весь миръ приобрящеши, последи смерть всяко восхититъ тя; чесо ради на теле душу предалъ еси, аще убоялся еси смерти, по своихъ бесоизвыкшихъ друзей и назирателей ложному ихъ слову? И всюду, яко же беси на весь миръ, тако же и ваши изволившия быти друзи и служебники,[49] насъ же отвергшеся, преступивше крестное целование, бесовъ подражающе, на насъ многоразличными виды всюду сети поляцающе и бесовскимъ обычаемъ насъ всячески назирающе, блюдуще глаголания и хождения, мняще насъ аки безплотныхъ быти,[50] и от сего многая сшивающе на насъ поношения и укоризны, и во весь миръ позорующихъ и к вамъ приносяще. Вы же имъ воздарие многое за сие злодейство даровали есте нашею же землею и казною, называючи ихъ ложно слугами; и ото сихъ бесовскихъ слуховъ наполнилися есте на мя ярости, яко же ехидна смертоносна, возъярився на мя и душу свою погубивъ, и на церковное разорение стали есте. Не мни праведно быти: возъярився на человека и Богу приразитися; ино бо человеческо есть, аще перфиру носитъ, ино же Божествено есть. Или мниши, окаянне, како уберечися того? Никако же! Аще ти с ними воеватися, тогда ти и церкви разоряти, и иконы попирати и крестияны погубляти; аще и руками где не дерзнеши, но мыслию яда своего смертоноснаго много сия злобы сотвориши.

Помысли же, како браннымъ пришествиемъ мяхкая младенческая удеса конскими ногами стираема и разтерзаема! Егда убо зиме належащи, сия наипаче злоба совершается. И сие убо твое злобесное изменное собацкое умышление како не уподобится Иродовому злому неистовству, еже во младенцехъ убийство показа? Сие ли убо мниши быти благочестие, еже сицевая творити злая? Аще ли же насъ глаголеши воюющихъ на кристьянъ, еже на германы и литаоны[51] — ино несть сие, несть. Аще бы и кристияне были в техъ странахъ, и мы воюемъ по прародителей своихъ обычаю, яко же и прежде сего многажды случилося; ныне же вемы, в техъ странахъ несть християнъ,[52] разве малейшихъ служителей церковныхъ и сокровенныхъ рабъ Господнихъ. К сему убо и литовская брань учинилася вашею изменою и недоброхотствомъ и нерадениемъ[53] безсоветнымъ.

Ты же тела ради душу погубилъ еси, и славы ради мимотекущия нетленную славу презрелъ еси, и на человека возъярився, на Бога возсталъ еси. Разумей же, бедникъ, от каковыя высоты и в какову пропасть душею и теломъ сшелъ еси! Збысться на тебе реченное: «Иже имея мнится, взято будетъ от него».[54] Се твое благочестие, еже самолюбия ради погубилъ ся еси, а не Бога ради? Могутъ же разумети и тамо сущии и разумъ имуще твой злобный ядъ, яко славы ради сея маловременныя жизни скоротекущаго веку и богатства ради сие сотворилъ еси, а не от смерти бегая. Аще праведенъ и благочестивъ еси, по твоему глаголу, почто убоялся еси неповинныя смерти,[55] еже несть смерть, но приобретение? Последи же всяко умрети же. Аще ли же убоялся еси ложнаго на тя отречения смертнаго, по твоихъ друзей, сотонинскихъ слугъ, злодейственному солганию, се убо явно есть ваше изменное умышление от начала и до ныне. Почто же апостола Павла презрелъ еси, якоже рече: «Всяка душа владыкамъ превладеющимъ да повинуется; никоя же бо владычества, яже не от Бога, учиненна суть: темъ же противляяйся власти Божию повелению противится».[56] Смотри же сего и разумей, яко противляяйся власти Богу противится; аще убо кто Богу противится, — сей отступник именуется, еже убо горчайшее согрешение. Сие же убо реченно бысть о всякой власти, еже убо кровми и бранми приемлюще власти. Разумей же реченное, яко не восхищениемъ прияхомъ царство; темъ же наипаче противляяйся власти Богу противится. Тако же и апостолъ Павелъ рече, ты же и сия словеса презрелъ еси: «Раби, послушайте господий своихъ, не перед очима точию работающе, яко человекомъ угодницы, но яко Богу, и не токмо благимъ, но и строптивымъ, не токмо за гневъ, но и за совесть».[57] Се бо есть воля Господня, еже благое творяще пострадати.[58] И аще праведенъ еси и благочестивъ, про что не изволилъ еси от мене, строптиваго владыки, страдати и венецъ жизни наследити?

Но ради привременныя славы, и самолюбия, и сладости мира сего все свое благочестие душевное со крестиянскою верою и з закономъ попралъ еси, уподобился еси семени, падающему на камени и возрастшему;[59] возсиявшу же солнцу со зноемъ, абие словесе ради ложнаго соблазнился еси, и отпалъ еси и плода не сотворилъ еси; и по ложныхъ словесехъ убо, подобно на пути падающему семени, сотворилъ еси, еже убо всеявше слово к Богу веру истинну и к намъ прямую службу — сие убо врагъ все из сердца твоего изхитилъ есть и сотворилъ в своей воли ходити. Темъ же и вся Божественная Писания исповедуютъ, яко не повелеваютъ чадомъ отцемъ противитися, а рабомъ господиямъ кроме веры. Аще убо сие от отца твоего, диявола, восприимъ, много ложными словесы своеми сплетаеши, яко веры ради избежалъ еси — и сего ради живъ Господь Богъ мой, и жива душа моя,[60] — яко не токмо ты, но и все твои согласники, бесовские служители, не могутъ в насъ сего обрести. Паче же уповаемъ, Божия слова воплощениемъ и пречистыя его матери, заступницы христианския милостию и всехъ святыхъ молитвами, не токмо тебе сему ответъ дати, но и противу поправшихъ святыя иконы, и всю християнскую божественную тайну отвергшимъ, и Бога отступльшимъ (к нимъ же ты любителне совокупился еси), словесъ сихъ нечестие изобличити и благочестие явити и воспроповедати, яко же благодать возсия.

Како же не устрамишися раба своего Васки Шибанова?[61] Еже убо онъ свое благочестие соблюде, пред царемъ и пред всемъ народомъ, при смертныхъ вратехъ стоя, и крестнаго ради целования тебе не отвержеся и похваляяся всячески, умрети за тебе тщашеся. Ты же убо сего благочестию не поревновалъ еси: единаго ради малаго слова гневна не токмо свою едину душу, но и своихъ прародителей души погубилъ еси, понеже Божиимъ изволениемъ деду нашему, великому государю, Богъ ихъ поручилъ в работу, и они, давъ свои души, и до своей смерти служили, и вамъ, своимъ детямъ, приказали служити деда нашего детямъ и внучатомъ. И ты то все забылъ еси, собацкимъ изменнымъ обычаемъ преступивъ крестное целование, ко врагомъ християнскимъ соединился еси; и к тому, своея злобы не разсмотря, сицевыми скудоумными глаголы, яко на небо камениемъ меща, нелепая глаголеши, и раба своего благочестия не стыдишися, и подобная тому сотворити своему владыце отвергся еси.

Писание же твое приято бысть и уразумлено внятелно. Понеже бо еси положилъ ядъ аспиденъ под устнами своими, наполнено убо меда и сота по твоему разуму, горчайши же пелыни обретающеся; пророку глаголющему: «Умякнуша словеса ихъ паче елея, и та суть стрелы».[62] Тако ли убо навыклъ еси, кристиянинъ будучи, кристиянскому государю подобно служити? И тако ли убо честь подобна воздаяти от Бога данному владыце, якоже ты бесовскимъ обычеемъ ядъ отрыгаеши? Начало убо твоего писания, еже убо разумевая написалъ еси, навацкое помышляя, еже убо не о покаянии, но выше человеческаго естества мниши человекомъ быти, якоже и Наватъ. А еже убо насъ «во православие и во пресветлыхъ явившася» написалъ еси, и сие убо тако и есть: яко же тогда, тако и ныне веруемъ, верою истинною, Богу живу и истинну. А еже убо «супротивнымъ, разумеваяй совесть прокаженну имуще»,[63] се убо навацкое помышляеши, и не разсуждаеши еуаггельского слова. (...)

Ино се ли «совесть прокаженна», яко свое царство в своей руце держати, а работнымъ своимъ владети не давати? И се ли «сопротивенъ разумъ», еже не хотети быти работными своими владенну? Се ли «православия пресветлое», еже рабы обладаему и повелеваему быти?

Сие убо о внешнихъ; о душевныхъ же и о церковныхъ аще и есть мало некое согрешение, но и сие от вашего же соблазна и измены, паче же убо и человекъ есми: несть бо человека без греха, токмо Богъ единъ; а не яко же ты, еже мнишися быти выше человека, со аггелы равенъ. А о безбожныхъ языцехъ, что и глаголати! Понеже те все царствии своими не владеютъ: какъ имъ повелятъ работные ихъ, тако и владеютъ. А Российское самодержавство изначала сами владеютъ своими государствы, а не боляре и велможи! И того в своей злобе не моглъ еси разсудити, нарицая благочестие, еже подо властию нарицамаго попа[64] и вашего злочестия повеления самодержавству быти. А се по твоему разуму «нечестие», еже от Бога данные намъ власти самемъ владети и не восхотехомъ подо властию быти попа и вашего злодеяния? Се ли разумеваемая «супротивъ», яко вашему злобесному умышлению тогда Божиею милостию и пречистые Богородицы заступлениемъ и всехъ святыхъ молитвами и родителей своихъ благословениемъ погубити себя не далъ есми? А какова злая от васъ тогда пострадахъ, сие убо пространнейши напреди словомъ известитъ.

Аще ли же о семъ помышляеши, яко церковное предстояние не тако и играмъ бытие,[65] се убо вашего же ради лукаваго умышления бысть, понеже мя исторгосте от духовнаго покойнаго жития и бремя фарисейскимъ обычаемъ бедне носима на мя наложисте, сами же ни единымъ перстомъ не прикоснустеся; и сего ради церковное предстояние не твердо, ово убо ради царскихъ правлений, еже вами разрушенно, ово же вашихъ злолукавыхъ умышлений бегая. Играмъ же — сходя немощи человечестей, понеже многъ народъ в следъ своего пагубнаго умышления отторгосте, и того ради — яко же мати детей пущаетъ глумления ради младенства, и егда же совершени будутъ, тогда сия отвергнутъ или убо от родителей разумомъ на уншее возведутся, или яко же Израилю Богъ попусти, аще и жертвы приносити, токмо Богови, а не бесомъ, — того ради и азъ сие сотворихъ, сходя к немощи ихъ, точию дабы насъ, своихъ государей, познали, а не васъ, изменников. И чимъ у васъ извыкли прохлажатися?

И се ли «супротивно явися», еже вамъ погубити себя не далъ есми? А ты о чемъ сопротивно разуме души своей и крестное целование ни во что же вменилъ еси, ложнаго ради страха смертнаго? Самъ убо сего не твориши, намъ же сие советуеши! И сие убо навацкое и фарисейское мудрствуеши: наватское убо, еже выше естества человеческаго велиши человекомъ быти, фарисейское же, еже самъ не творя, инымъ повелеваеши творити. Паче же сия поносы и укоризны, яко же исперва начали есте, тако и ныне не престаете, всяческимъ образомъ дивияго зверя разпыхаяся, измену свою совершаете: се ли ваша прямая и доброхотная служба, еже поношати и укаряти? Бесному подобляшеся колеблетеся и Божий судъ восхищающе и прежде Божия суда своимъ злолукавымъ самохотнымъ изложениемъ, яко же с своими началники, с попомъ и Алексеемъ,[66] изложили есте, собацки осуждающе. И сего ради Богу противни являющеся, како и святыхъ всехъ преподобныхъ, иже в посте и в подвизе просиявшихъ, милование, еже ко грешнымъ, отвергосте; много бо в нихъ обрящеши падшихъ и возставшихъ (восстание не бедно!) и страждущимъ руку помощи подавше, и от рва согрешения миловательне возведшихъ, по апостолу, «яко братию, я не яко враговъ имуще»,[67] — еже ты отверглъ еси! И якова они бо от бесовъ пострадаша, таковая азъ же от васъ пострадахъ.

Что же, собака, и пишеши и болезнуешъ, совершивъ таковую злобу? Чему убо советъ твой подобенъ, паче кала смердяй? Или мниши праведно быти, еже от единомысленниковъ твоихъ злобесныхъ учинено, еже иноческое одеяние свергше и на крестьянъ воевати? Или се есть вамъ на отвещание, яко неволное пострижение? Ино несть се, несть. Како убо Лествичникъ[68] рече: «Видехъ неволею ко иночеству пришедшихъ, паче волныхъ исправившихся». Чесо убо сему слову не подражасте, аще благочестиви есте? Много же и не в Тимохину версту[69] обрящеши, тако же постриженыхъ, и не поправшихъ иноческаго образа, глаголю бо и до царей. Аще ли кои дерзнуша тако сотворити, ничимъ же себе ползоваша, но паче в горшая душевная и телесныя погибели приидоша, яко же князь великий Рюрикъ Ростиславичъ Смоленский постриженъ от зятя своего Романа Галического. Смотри же благочестия княгини его: восхотевшу ему взяти ея из неволнаго пострижения, она же не восхоте мимотекущаго царствия, но паче желая нетленнаго, пострижеся и в схиму; онъ же убо, розстригшися, много крови християнския пролия и святыя церкви и монастыри пограби, и игуменовъ и поповъ и чернцовъ помучи, и до конца княжения удержати не возможе, но имя его без вести бысть. (...)

Како же сего не моглъ еси разсудити, яко подобаетъ властелемъ не зверски яритися, ниже безсловесно смирятися? Якоже рече апостолъ: «Овехъ убо милуйте разсуждающе, овехъ же страхомъ спасайте, от огня восхищающе».[70] Видиши ли, яко апостолъ страхомъ повелеваетъ спасати? Тако же и во благочестивыхъ царехъ и временехъ много обрящеши злейшее мучение. Како убо, по твоему безумному разуму, единако быти царю, а не по настоящему времени? То убо разбойницы и татие мукамъ неповинни суть? Паче же и злейша сихъ лукавая умышления! То убо вся царствия нестроении и межоусобными бранми разтлятся. И тако ли убо пастырю подобаетъ еже не разсмотряти о неустроении о подовластныхъ своихъ? (...)

Сие ли убо «супротивно разуму», еже по настоящему времени жити? Воспомяни же и в царехъ великого Константина: како царствия ради сына своего, рожденнаго от себе, убилъ есть.[71] И князь Феодоръ Ростиславичь,[72] прародитель вашъ, в Смоленсце на Пасху колики крови пролиялъ есть. И во святыхъ причитаются. (...) Всегда бо царемъ подобаетъ обозрителнымъ быти: овогда кротчайшимъ, овогда же ярымъ; ко благимъ убо милость и кротость, ко злому же ярость и мучение, аще ли сего не имея, несть царь. Царь бо несть боязнь деломъ благимъ, но злымъ. Хощеши ли не боятися власти, то благое твори; аще ли зло твориши, бойся, не бо туне мечь носитъ — в месть убо злодеемъ, в похвалу же добродеемъ. Аще благъ еси и правъ, почто, имея в сигклите пламени паляща, не погасилъ еси, по паче разжеглъ еси? Где было ти советомъ разума своего злодейственный советъ[73] исторгнути, ты же убо болми плевела наполнилъ еси. И збысться на тебе пророческое слово: «Се все вы огнь зжете, и ходите по совету в пламени огня вашего, егоже сами себе разжгосте».[74] Како ли убо ты не со Июдою предателемъ равно причтешися! Яко же убо онъ на общаго владыку всехъ богатства ради возбесися и на убиение предастъ со ученики убо водворяшеся, со июдеи же веселяшеся, такоже убо и ты, с нами же убо пребывая, и хлебъ нашъ ядяше, и намъ служити соглаголаше, на насъ же вся злая в сердцы собираше. Тако ли убо исправилъ еси крестное целование, еже хотети добра во всемъ безо всякия хитрости? И что убо твоего злаго умышления злее? Якоже рече премудръ: «Несть главы, паче главы змиевы»,[75] паче же несть злее злобы твоей. (...)

Или мниши сие светлость благочестива, еже обладатися царству от попа невежи[76] и от злодейственныхъ изменныхъ человекъ и царю повелеваему быти? И сие ли «супротивно разуму и совесть прокаженна», еже невежу взустити и злодейственныхъ человекъ возразити, и от Бога данному царю воцаритися? Нигде же бо обрящеши, еже не разоритися царству, еже от поповъ владому. Ты же почто ревнуеши — иже во грецехъ царствие погубиша и туркомъ повинующимся?[77] Сию убо погибель и намъ советуеши? И сия убо погибель на твою главу паче да будет! (...)

Или убо сие светъ, яко попу и прегордымъ лукавымъ рабомъ владети, царю же токмо председаниемъ и царскою честию почтенну быти, властию же ничимъ же лучши быти раба? А се ли тма, яко царю содержати царство и владети, рабомъ же рабская содержати повеленная? Како же и самодержецъ наречется, аще не самъ строит? (...)

Речеши ли убо, яко едино слово обращая пишу? Понеже бо есть вина и главизна всемъ деломъ вашего злобеснаго умышления, понеже с попомъ положисте советъ, дабы азъ словомъ былъ государь, а вы б с попомъ деломъ. Сего ради вся сия случишася, понеже и доныне не престаете, умышляюще советы злыя. Воспомяни же, егда Богъ извождаше Израиля из работы, егда убо священника постави владети людми, или многихъ рядниковъ? Но единого Моисея, яко царя, постави владателя над ними; священствовати же ему не повеленно, Аарону, брату его, повеле священствовати,[78] людскаго же строения ничего не творити; егда же Ааронъ сотвори людскии строи, тогда от Господа люди отведе. Смотри же сего, яко не подобаетъ священникомъ царская творити. (...)