Смотри же убо се и разумей, како управление составляется в разныхъ началехъ и властехъ, понеже убо тамо быша царие послушны епархомъ и синклитомъ, и в какову погибель приидоша. Сия ли убо и намъ советуеши, еже к таковей погибели приити? И сие ли убо благочестие, еже не строити царства, и злодейственныхъ человекъ не взустити, и к разорению иноплеменныхъ подати? Или речеши ми, яко святителская поучения тамо приимаху? Ей благо и прикладно! Но ино убо еже свою душу спасати, ино же многими душами и телесы пещися; ино убо есть постническое пребывание, ино же во общемъ житии сожитие, ино же святителская власть, ино царско правление. Постническое пребывание подобно агньцу, непротивну никому же, или яко птице, иже ни сеявшу, ни жнущу, ни в житницу собирающу; во общемъ убо житии, аще и мира отрекшимся, но обаче строения и попечения имеютъ, тако же и наказание, аще ли сего невнимателни будутъ, то общее житие разорится; святителская же власть требуетъ зелнаго запрещения языкомъ по благословней же вине и ярости, славы и чести и украшения, и председания, еже инокомъ неприлично; царскому же правлению — страха, и запрещения, и обуздания, и конечнейшаго запрещения по безумию злейшихъ человекъ лукавыхъ. Се убо разумей разньство постничеству, и общежителству, и святителству, и царству. И аще убо царю се прилично, иже биющему в ланиту обратити другую? Се убо совершеннейшая заповедь. Како же управити, аще самъ без чести будетъ? Святителемъ же сие прилично. По сему разумей разньства святителству с царствомъ. Обрящеши же много и во отрекшихся мира наказания, аще и не смертию, но зело тяжкая наказания. Колми же паче въ царствие подобаетъ наказанию злодейственнымъ человекомъ быти!

Тако же убо и ваше хотение, еже вамъ на градехъ и на властехъ совладети, идеже быти, не подобаетъ. И что от сего случишася в Руси, егда быша в коемждо граде градоначалницы и местоблюстители[79] и какова разорения быша, от сего самъ своима беззаконныма очима видалъ еси, от сего можеши разумети, что сие есть. (...)

Како же убо изменниковъ сихъ доброхотными наречеши? Якоже убо во Израили случися с Авимелехомъ оженимыя Гедеоновы, сиречь наложницы, лжею согласившеся, и лесть сокрывше, во единъ же день избиша семдесятъ сыновъ Гедеоновыхъ,[80] еже убо от законныхъ женъ ему, и воцариша Авемелеха, тако же убо и вы, собацкимъ своимъ изменнымъ злымъ обычаемъ, похотесте в царствии царей достойныхъ истребити, да аще и не от наложницы, но от царствия разстоящеся колена и хотесте воцарити. И се ли убо доброхотны есте и души за мя полагаете, еже, подобно Ироду, ссущаго млеко младенца моего смертию пагубною хотесте света сего лишити, чюжаго же царя в царство ввести? Се ли за мя душу полагаете и доброхотствуете? И тако ли убо своимъ чадомъ хощете сотворити, егда убо въ яйца место подадите скорпию или в рыбы место камень?[81] Аще бо вы злы суще умеете даяния благая даяти чадомъ вашимъ, и аще убо доброхотны и благи наречетеся, — почто убо такихъ благихъ даяний не приносите чадомъ нашимъ, якоже своимъ? Но понеже убо извыкосте от прародителей своихъ измену учинити: якоже дедъ твой, князь Михайло Карамышъ, со княземъ Андреемъ Углецкимъ[82] на деда нашего, великого государя Иванна, умышлял изменныи обычаи, тако же отецъ твой, князь Михайло, с великимъ княземъ Дмитриемъ внукомъ[83] на отца нашего, блаженныя памяти великого государя Василия, многия пагубы и смерти умышлялъ, тако же и матери твоей деды,[84] Василей да Иванъ Тучки, многая поносная и укоризненная словеса деду нашему, великому государю Ивану, износили; такоже и дедъ твой, Михайло Тучковъ, на преставление матери нашея, великие царицы Елены, про нее дьяку нашему Елизару Цыплятеву многая надменная словеса изрече; и понеже еси порождение изчадья ехиднова, посему такой ядъ отрыгаеши. Се убо доволно указахъ ти, чесо убо ради по твоему злобесному разуму «супротивнымъ обретаяся разумевая», и «разумевая совесть прокаженну имуще», не мни, яже никакого от державы моея несть. А отцу твоему, князю Михайлу, гонения было много, да и убожества, а измены такой не учинилъ, яко же ты, собака.

А еже писалъ еси,[85] про что есмя силныхъ во Израили побили, и воеводъ, от Бога данныхъ намъ на враги наша, различными смертми расторгли есмя, и победоносную ихъ святую кровь в церквахъ Божиихъ пролияли есмя, и мученическими кровми праги церковные обагрили есмя, и на доброхотныхъ своихъ и души за насъ полагающихъ неслыханые муки, смерти и гонения умыслили есми, изменами и чародействы и иными неподобными облыгая православныхъ, и то еси писалъ и глаголалъ лжею, яко же отецъ твой, диаволъ, научилъ тя есть, понеже рече Христосъ: «Вы отца вашего диявола есте и похоти отца вашего хощете творити, яко же онъ бе человекоубийца искони, и во истинне не стоитъ, яко несть истинны в немъ; и егда ложь глаголетъ, от своихъ глаголетъ: ложь бо есть и отецъ его».[86] А силныхъ есми во Израили не побили, и не вемъ, кто есть силнейший во Израили, понеже бо Русская земля правится Божиимъ милосердиемъ, и пречистые Богородицы милостию, и всехъ святыхъ молитвами, и родителей нашихъ благословениемъ, и последи нами, своими государи, а не судьями и воеводы, ниже ипаты и стратиги.[87] Ниже воеводъ своихъ различными смертми разторгли есмя, а з Божиею помощию имеемъ у себе воеводъ множество и опричь васъ, изменниковъ. А жаловати есмя своихъ холопей волны, а и казнити волны же есми были.

Крови же в церквахъ Божиихъ никакие не проливали есмя. Победоносные же святыя крови в своей земле в нынечнее время ничьея явленно не вемы. Праги же церковныя, — елика наша сила и разумъ осязаетъ, яко же подовластные наши к намъ службу свою являютъ, сице украшенми всякими церкви Божия светится, всякими благостинями; елика после вашея державы бесовския сотворихомъ, не токмо праги, и помостъ, и предверия, елика всемъ видима есть иноплеменнымъ украшения. Кровию же никакою праги церковныя не обагряемъ; мучениковъ же в сие время за веру у насъ нетъ; доброхотныхъ же своихъ и душу за насъ полагающихъ истинно, а не лестно, не языкомъ глаголюще благая, а сердцемъ злая собирающе, не пред очима собирающе и похваляюще, а вне — расточяюще и укаряюще (подобно зерцалу, егда смотря и тогда видитъ, каковъ бе, егда же отъидетъ, тогда забудетъ, каковъ бе)[88] и, егда кого обрящемъ, всехъ сихъ злыхъ свобожденна, а к намъ прямую свою службу содевающе и не забывающе порученныя ему службы, яко в зерцале, и мы того жалуемъ своимъ великимъ всякимъ жалованиемъ; а еже обрящется в сопротивныхъ, еже выше рехомъ, тотъ по своей вине и казнь приемлетъ. А в ыныхъ земляхъ самъ узриши, елика содеваются злымъ злая — тамъ не по здешнему. То вы своимъ злобеснымъ обычаемъ утвердили изменниковъ любити, а в ыныхъ земляхъ израдецъ не любятъ и казнятъ, да темъ и утвержаются.

А мукъ и гонения и смертей многообразныхъ ни на кого не умысливали есмя; а еже о изменахъ и чародействе воспомянулъ еси, ино такихъ собакъ везде казнятъ.

А еже нечто облыгаемъ православныхъ, и понеже убо уподобился еси аспиду глухому, по пророку глаголющему, яко «аспидъ глухий затыкаетъ уши свои, иже не слышитъ гласа обавающаго, обаче обаваемъ обавается от премудра, понеже зубы ихъ во устехъ ихъ сокрушилъ есть Господь и членовныя лвомъ сокрушилъ есть»;[89] и аще азъ облыгаю, о иномъ же истинна о комъ явится? Ино то изменники чесо не сотворятъ, а обличения несть имъ, по твоему злобесному умышлению? Чесо же ради намъ сихъ облыгати? Власти ли от своихъ работныхъ желая, или рубища ихъ худая, или колеб ихъ насытитися? Како убо смеху не подлежитъ твой разумъ? На заецъ потреба множество псовъ, на враги же множество вои; како убо безлепа казнити подовластныхъ, имуще разумъ!

И якоже выше рехъ, какова злая пострадахъ от васъ от юности даже и доныне, пространнейши изобличити. Се убо являемъ (аще убо и юнъ еси сихъ летъ, но обаче ведети можеши): егда Божиими судбами отецъ нашъ, великий государь Василей, пременивъ порфиру аггельскимъ пременениемъ, тленное сие мимотекущее земное царствие оставилъ, преиде на небесная[90] во онъ векъ нескончаемый, предстояти Царю царемъ и Господу господемъ, мне же оставльшуся со единороднымъ братомъ, святопочившимъ Георгиемъ.[91] Мне убо трею летъ суще, брату же моему лета единого, родителнице же нашей, благочестивой царице Елене, в сицеве бедне вдовстве оставшей, яко в пламени отвсюду пребывающе, ово убо от иноплеменныхъ языкъ откругъ приседящихъ брани непремерителныа приемлюще от всехъ языкъ, литаонска, и поляковъ, и перекопий, тарханей, и нагай, и казани,[92] ово же от васъ изменниковъ беды и скорби разными виды приемлюще, яко же подобно тебе, бешеной собаке, князь Семенъ Белской да Иванъ Ляцкой[93] оттекоша в Литву и камо ни скакаше бесящеся, — въ Царьградъ, и в Крымъ, и в Нагаи, и отовсюду на православие рати воздвизающе. Но ничтоже успеша: Богу заступающу, и пречистой Богородице, и великимъ чюдотворцомъ, и родителей нашихъ молитвами и благословениемъ, вся сия якоже Ахитофель[94] советъ разсыпася. Такоже потомъ дядю нашего, князя Андрея Ивановича,[95] изменники на насъ подъяша, и с теми изменники пошолъ былъ к Новугороду (и которыхъ хвалиши, доброхотныхъ намъ и душу за насъ полагающихъ называеши), и те в те поры от насъ отступили и приложилися к дяде нашему, ко князю Андрею, а в головахъ твой братъ, князь Иванъ княжь Семеновъ сынъ, княжь Петрова Головы Романовича,[96] и иные многие. И тако Божиею помощию тотъ советъ не совершися. Ино то ли техъ доброхотство, которыхъ ты хвалиши? И тако ли душу свою за насъ полагаютъ, еже насъ хотели погубити, а дядю нашего воцарити? По томъ же, изменнымъ обычаемъ, недругу нашему литовскому державцу почали вотчину нашу отдавати, грады Радогощъ, Стародубъ, Гомей[97] — и тако ли доброхотствуютъ? Егда несть во всей земле, кемъ погубити от земли и славы в персть вселити, и тогда иноплеменнымъ примешаются любовию, точию да погубятъ безпамятне!

Такоже изволися судбами Божиими быти, родителнице нашей, благочестивой царице Елене, преити от земнаго царствия на небесное,[98] намъ же со святопочившимъ братомъ Георгиемъ сиротствующимъ родителей своихъ и ниоткуду же промышления человеческаго не приемлюще, токмо на Божие милосердие уповающе и пречистые Богородицы милость, и на всехъ святыхъ молитвы, и на родителей своихъ благословение и упование положихомъ. Мне же осмому лету от рождения тогда преходяще, и тако подвластнымъ нашимъ аки хотение свое улучившимъ, еже царство без владателя обретоша, насъ убо, государей своихъ, никоего промышления доброхотнаго не сподобиша, сами же ринушеся богатству и славе и тако наскочиша другъ на друга. И елико тогда сотвориша! Колико бояръ нашихъ, и доброхотныхъ отца нашего, и воеводъ избиша! Дворы, и села, и имение дядь нашихъ себе восхитиша и водворишася в нихъ. И казну матери нашей перенесли в Болшую казну, неистово ногами пхающе и осны колюще, а иное же разъяша. А дедъ твой, Михайло Тучковъ, то и творилъ. И тако князь Василей и князь Иванъ Шуйские самоволствомъ у меня в бережении учинилися[99] и тако воцаришася; а техъ всехъ, которые отцу нашему и матери нашей были главные изменники, ис поимания ихъ выпускали[100] и к себе ихъ примирили. А князь Василей Шуйской на дяди нашего княжь Андрееве дворе учалъ жити, и на томъ дворе сонмищемъ июдейскимъ отца нашего и нашего дьяка ближнего Федора Мишурина изымав и позоровавши убили,[101] и князя Ивана Федоровича Белского и иныхъ многихъ в разные места заточиша; и на церковь вооружишася и Данила митрополита, сведше с митрополии, и в заточение послаша;[102] и тако свое хотение во всемъ учиниша и сами убо царствовати начаша. Насъ же со единороднымъ братомъ моимъ, святопочившим Георгиемъ, питати начаша яко иностранныхъ или яко убожейшую чадь. Мы же пострадали во одеянии и в алчбе. Во всемъ бо семъ воли несть; но вся не по своей воли и не по времени юности. Едино воспомянути: намъ бо въ юности детская играюще, а князь Иванъ Васильевичъ Шуйской седя на лавке, лохтемъ опершися о отца нашего постелю, ногу положа на стулъ, к намъ же не прикланяяся не токмо яко родителски, но ниже властелски, рабское же ничтоже обретеся. И такова гордения кто можетъ понести? Како же исчести таковая бедне страдания многа, еже от юности пострадахъ? Многажды же поздо ядохъ не по своей воле. Что же убо о казнахъ родителского ми достояния? Вся восхитиша лукавымъ умышлениемъ, бутто детемъ боярскимъ жалование, а все себе у нихъ поимаша во мздоимание, а ихъ не по делу жалуючи, верстаютъ не по достоинству; а казну деда нашего и отца нашего безчисленну себе поимаша, и такъ в той нашей казне исковаша себе сосуды златыя и сребреныя и имена на нихъ родителей своихъ возложиша, бутто ихъ родителское стяжание. А всемъ людемъ ведомо: при матери нашей у князя Ивана Шуйсково была шуба мухояръ зеленъ на куницахъ, да и те ветхи; и коли б то было ихъ старина, и чемъ было сосуды ковати, ино лутчи шуба переменити, а в ысходке сосуды ковати. Что же о казнахъ дядь нашихъ глаголати? Но все себе восхитиша. По семъ же на грады и села возскочиша, и тако горчайшимъ мучениемъ многообразными виды имения ту живущихъ без милости пограбиша. Суседствующихъ же от нихъ напасти кто может исчести? Подовластныхъ же всехъ аки рабы себе сотвориша, рабы же своя аки велможи сотвориша, правити же мнящеся и строити, и вместо сего неправды и нестроения многая устроиша, мзду же безмерну ото всехъ збирающе, и вся по мзде творяще и глаголюще.

И тако имъ многа лета жившимъ, мне же возрастомъ тела преспевающе, и не восхотехъ под властию рабскою быти, и того для князя Ивана Василевича Шуйского от себя отослалъ на службу, а у себя есми велелъ быти боярину своему князю Ивану Федоровичю Белскому.[103] И князь Иванъ Шуйской, приворотя к себе всехъ людей и к целованию приведе, пришелъ ратию к Москве,[104] и боярина нашего князя Ивана Федоровича Белскаго и иныхъ бояръ и дворянъ переимали советники его Кубенские и иные[105] до его приезду, и сослали на Белоезеро и убили,[106] да и митрополита Иоасафа с великимъ безчестиемъ с митрополии согнаша.[107] Такоже и князь Андрей Шуйской[108] с своими единомысленники пришедъ к намъ в ызбу в столовую, неистовымъ обычаемъ перед нами изымали боярина нашего Федора Семеновича Воронцова,[109] ободравъ его и позоровавъ, вынесли из ызбы да убити хотели. И мы посылали к нимъ митрополита Макария, да бояръ своихъ, Ивана да Василия Григорьевичевъ Морозовыхъ,[110] своимъ словомъ, чтобъ его не убили, и оне едва по нашему слову послали его на Кострому, а митрополита затеснили и манатию на немъ с ысточники изодрали, а бояръ в хребетъ толкали. Ино то ли доброхотны, что бояръ нашихъ и угодныхъ сопротивно нашему повелению переимали и побили и разными муками и гонении мучили? И тако ли годно за насъ, государей своихъ, души полагати, еже к нашему государьству ратию приходити и перед нами сонмищемъ июдейскимъ имати и с нами холопу зъ государемъ ссылатися и государю у холопа выпрашивати? Тако ли пригоже прямая служба воинству? Вся вселенная подсмеетъ, видя такую правду! О гонении же что изглаголати, каковы тогда случишася? От преставления матери нашия и до того времени шесть летъ и полъ[111] не престаша сия злая.

Намъ же пятагонадесятъ лета возраста преходяще, и тако сами яхомся строити свое царство, и по Божие милости и благо было началося строити. И понеже грехомъ человеческимъ повсегда Божию благодать раздражающимъ, и тако случися грехъ ради нашихъ Божию гневу распростершуся, пламени огненному царствующий градъ Москву попалившу, наши же изменные бояре, от тебе же нарицаемыя мученики (ихъже имена волею премину), аки время благополучно своей изменной злобе улучиша, научиша народъ скудожайшихъ умомъ,[112] бутто матери нашей мать, княгини Анна Глинская, с своими детьми и людми, сердца человеческия выимали и такимъ чародействомъ Москву попалили, да бутто и мы тотъ ихъ советъ ведали. И тако техъ изменниковъ научениемъ боярина нашего, князя Юрья Василевича Глинсково,[113] воскричавъ народъ июдейскимъ обычаемъ, изымали его в пределе великомученика Христова Димитрия Селунского, выволокли его в соборную и апостольскую церковь Пречистые Богородицы[114] противу митрополича места, без милости его убиша и кровию церковь наполниша, и выволокли его мертва в передние двери церковныя и положиша его на торжищи яко осужденика. И сие в церкви убийство всемъ ведомо, а не яко же ты, собака, лжеши! Намъ же тогда живущимъ в своемъ селе Воробьеве,[115] и те изменники научили были народъ и насъ убити за то, что бутто мы княжь Юрьеву мати, княгиню Анну, и брата его, князя Михаила,[116] у себя хоронимъ от нихъ. Како убо смеху не подлежитъ мудрость сия? Почто убо намъ самимъ царству своему запалителемъ быти? Толика убо стяжания, прародителей нашихъ благословение, у насъ погибоша, еже ни во вселенней обрястися можетъ. Кто же безуменъ или яръ таковъ обрящется, разгневався на рабы, да свое стяжание погубити? И онъ бы ихъ попалилъ, а себя бы уберегъ. Во всемъ ваша собачья измена обличается! Якоже сему подобно, еже Иванъ Святый[117] водою кропити, толику безмерну высоту имущу. И сие убо безумие ваше явственно. И тако ли доброхотно подобаетъ нашимъ бояромъ и воеводамъ намъ служити, еже такими собрании собатцкими без нашего ведома бояръ нашихъ убивати, да еще в черте кровномъ намъ? И тако ли душу свою за насъ полагаютъ, еже убо душу нашу желаютъ от мира сего на всякъ часъ во онъ векъ препустити? Намъ убо законъ полагающе во святыню, сами же с нами путишествовати не хотяще! Что же, собака, и хвалишися в гордости и иныхъ собакъ изменниковъ похваляеши бранною храбростию? Господу нашему Исусу Христу глаголющу: «Аще царство само на ся разделится, то не можетъ стояти царство то».[118] Како же можетъ бранная люте понести противу врага, аще междоусобными бранми растлится царство? Како убо можетъ древо цвести, аще корени суху сущу? Тако и сие: аще не прежде строения в царствии благо будетъ, како бранная храбре поставятся? Аще убо предводитель не множае полкъ утверждаетъ, тогда множае побеждаемъ паче бываетъ, неже победитъ. Ты же, вся сия презревъ, едину храбрость похваляеши; а о чесомъ же храбрости состоятися, сия ни во что же полагаеши, и являя ся не токмо утвержая храбрость, но паче разрушая. И являя ся яко ничтоже еси; в дому изменникъ, в ратныхъ же пребывании разсуждения не имея, понеже хощеши междоусобными бранми и самоволствомъ храбрость утвердити, емуже быти не возможно.

До того же времени бывшу сему собаке, Алексею Адашову, вашему началнику, нашего царствия во дворе, и въ юности нашей, не вемъ, какимъ обычаемъ из батожниковъ водворившася,[119] намъ же такия измены от велможъ своихъ видевше, и тако взявъ сего от гноища и учинивъ с велможами, а чающе от него прямые службы. Какихъ же честей и богатствъ не исполнихъ его, и не токмо его, но и родъ его! Какова же служения праведна от него прияхъ, напреди возвестимъ. По семъ же совета ради духовнаго и спасения ради души своея, прияхъ попа Селивестра,[120] а чающе тоже, что онъ, предстояния ради у престола Владычня, побрежетъ своея души, а онъ, поправъ священныя обеты и херотонию, иже со аггелы у престола Владычня предстояния, идеже желаютъ аггелы приникнути, идеже повсегда агнецъ Божий жремый за мирское спасение и никогдаже пожренный, — еже онъ во плоти сый, серафимския службы своими руками сподобися, и сия убо вся поправъ лукавымъ обычаемъ, исперва убо яко благо нача, последуя Божественному Писанию. Мне же ведевшу в Божественномъ Писании, како подобаетъ наставникомъ благимъ покорятися без всякого разсуждения, и сему совета ради духовнаго повинухся волею, а не в неведение; онъ же восхитився властию, якоже Илия жрецъ,[121] нача совокуплятися подобно в дружбу мирскимъ. По томъ же собрахомъ вся архиепископы, и епископы, и весь освященный соборъ русския митрополии,[122] и еже убо въ юности нашей содеянная, на васъ, бояръ нашихъ, наши опалы, та же и от васъ, бояръ нашихъ, еже намъ сопротивное и проступки, сами убо пред отцемъ своимъ и богомолцемъ, перед Макариемъ, митрополитомъ всеа Русии, во всемъ в томъ соборне простихомся; васъ же, бояръ своихъ, и всехъ людей своихъ в проступкахъ пожаловали и впередъ того не воспоминати, и тако убо мы всехъ васъ яко благи начахомъ держати.

Вы же перваго своего лукаваго обычая не остависте, но паки на первая возвратистеся, и паки начасте лукавымъ советомъ служити намъ, а не истинною, и вся со умышлениемъ, а не простотою творити. Такоже попъ Селивестръ со Алексеемъ здружилися и начаша советовати отаи насъ, мневше насъ неразсудныхъ суще, и тако вместо духовныхъ мирская нача советовати, и тако помалу всехъ васъ бояръ в самоволство нача приводити, нашу же власть с васъ снимающе, и в супротивословие васъ приводяще, и честию васъ мало не с нами равняюще, молотчихъ же детей боярскихъ с вами честию уподобляюще. И тако помалу утвердися злоба сия, и васъ почали причитати к вотчинамъ и ко градомъ и к селомъ, еже деда нашего великого государя уложение, которые вотчины у васъ взимати и которымъ вотчинамъ еже несть потреба от насъ даятися, и те вотчины ветру подобно раздаяли неподобно,[123] и то деда нашего уложение разрушили, и темъ многихъ людей к себе примирили. И по томъ единомысленника своего, князя Дмитрея Курлятева,[124] к намъ в синклитъ припустили, насъ же подходя лукавымъ обычаемъ духовнаго ради совета, бутто души ради то творитъ, а не лукавствомъ; и тако с темъ своимъ единомысленникомъ начал злый свой советъ утвержати, и ни единыя власти оставиша, идеже своя угодники не поставиша, и тако во всемъ свое хотение улучиша. По семъ же с темъ своимъ единомысленникомъ от прародителей нашихъ данную намъ власть от насъ отъяша, еже вамъ, бояромъ нашимъ, по нашему жалованию честию и председаниемъ почтеннымъ быти,[125] сия убо вся во своей власти и вашей положиша, яко же вамъ годе, и яко же кто какъ восхощетъ; по томъ же утвердися дружбами, и всю власть во своей воли имый, ничтоже от насъ пытая, аки несть насъ, вся строения и утверждения по своей воле и своихъ советниковъ хотения творяще. Намъ же что аще и благо советующе, сия вся непотребна имъ учиняхуся, они же аще что непотребна учиняху, аще что строптиво и развращенно советоваху, но сия вся во благо творяху.

И тако убо ниже во внешнихъ, ниже во внутреннихъ, ниже в малейшихъ и худейшихъ, глаголю же до пища и до спания, вся не по своей воле бяху, но по ихъ хотению творяхуся; намъ же аки младенцемъ пребывающимъ.

Ино се ли «сопротивно разуму», еже не восхотехомъ в совершеннемъ возрасте младенцемъ быти? Та же по семъ и сия утвердися: еже намъ противословие ни единому еже от худейшихъ советниковъ его тогда потреба рещи, но сия вся аки злочестива творяхуся, яко же въ твоей бесосоставной грамоте написано; от его же советниковъ, аще кто и худейших, намъ не яко владыце или яко к брату, но аки к худейшему человеку надменная словеса неистове изношаху, и сия вся благочестиве вменяхуся имъ; кто убо мало послушание или покой намъ сотворитъ, тому убо гонение и мучение велико; аще же кто раздражитъ насъ чемъ или кое принесетъ намъ утеснение, тому богатство, и слава, и честь; аще ли не тако, то душе пагуба и царству разорение. И тако убо намъ в сицевомъ гонении и утеснении пребывающимъ, и такова злая не токмо от дни до дни, но от часу растяху; и еже убо намъ сопротивно, сия умножахуся, а еже убо намъ послушно и покойно, сия умаляхуся. Таково убо тогда православие сияше! Кто же убо можетъ подробну изчести, еже в житейскихъ пребывании, хожениихъ и в покое, та же и в церковномъ предстоянии и во всякомъ своемъ житие гонение и утеснение? И тако убо симъ бывающимъ, намъ же сия Бога ради вмещающимъ, мняще убо яко душевныя ради ползы сицевая утеснения творитъ намъ, а не лукавства ради. Та же по Божию изволению со крестоносною хоругвию всего православнаго християнского воинства, православнаго ради християнства заступления, намъ бо двигшимся на безбожный языкъ казанский,[126] и тако неизреченымъ Божиимъ милосердиемъ, иже надтемъ безбожнымъ языкомъ победу показавше, со всемъ бо воинствомъ православнаго християнства здравы возвратихомся восвояси. Что же убо изреку от тебе нарицаемыхъ мучениковъ доброхотство к себе? Како убо, аки пленника всадивъ в судно, везяху зело с малейшими людми сквозе безбожную и неверную землю. Аще не бы всемогущая десница вышняя защитила мое смирение, то всячески живота гонзнулъ бы. Таково техъ доброхотство к намъ, за кого ты глаголешь, и тако за насъ душы полагаютъ, еже нашу душу во иноплеменыхъ руки тщатся предати!

Та же намъ пришедшимъ въ царствующий градъ Москву, Богу же милосердие свое к намъ множащу и наследника намъ тогда давшу, сына Димитрия;[127] мало же времени минувши, еже убо въ человеческомъ бытии случается, намъ же немощию одержымымъ бывшимъ и зелне изнемогшимъ, тогда убо еже от тебе нарицаемыя доброхотны возшаташася яко пиянии, с попомъ Селивестромъ и с началникомъ вашимъ Алексеемъ Адашовым,[128] мневше насъ небытию быти, забывше благодеяний нашихъ, ниже своихъ душъ, еже отцу нашему целовали крестъ и намъ, еже кроме нашихъ детей иного государя себе не имати, они же хотеша воцарити, еже от насъ разстоящася в коленехъ, князя Володимера,[129] младенца же нашего, еже от Бога даннаго намъ, хотеша подобно Ироду погубити, и како бы имъ не погубити, воцаривъ князя Володимера. Понеже бо и во внешнихъ писаниихъ древнихъ реченно есть,[130] но обаче прилично: «Царь бо царю не кланяется; но единому умершу, другий обладаетъ». Се убо намъ живымъ сущимъ, такова от своихъ подовластныхъ доброхотства насладихомся, что же убо по насъ будетъ! Та же Божиимъ милосердиемъ намъ узнавшимъ и уразумевшимъ внятелно, и сий советъ ихъ разсыпася, попу же Селивестру и Алексею Адашову оттоле не престающе вся злая советовати, и утеснение горчяйшее сотворяти, на доброхотныхъ же намъ гонение разными виды умышляюще, князю же Володимеру во всемъ его хотение утвержающе, та же и на нашу царицу Анастасию[131] ненависть зелну воздвигше и уподобляюще ко всемъ нечестивымъ царицамъ; чадъ же нашихъ ниже помянути могоша.

Та же по семъ собака изменникъ старый ростовской князь Семенъ, иже по нашей милости, а не по своему достоинству сподобленъ быти от нас синклитства, своимъ же изменнымъ обычаемъ литовскимъ посломъ, пану Станиславу Давойну с товарыщи, нашу думу изнесе,[132] насъ укаряя и нашу царицу и нашихъ чадъ; и мы то его злодейство сыскавъ, и еже милостиво казнь свою над нимъ учинили. И после того попъ Селивестръ и с вами, своими злыми советники, того собаку учалъ в велице брежение держати и помогати ему всеми благими, и не токмо ему, но и всему его роду. И тако убо оттоле всемъ изменникомъ благо время улучися, намъ же убо оттоле в болшомъ утеснении пребывающимъ: от нихъже во единомъ и ты былъ еси явленно, еже с Курлятевымъ насъ хотесте судити про Сицково.[133]

Та же убо наченшись войне, еже на германы,[134] о семъ же убо напреди слово пространнейши ся явитъ, попу же Селивестру и с вами, своими советники, о томъ на насъ люте належаще;[135] и еже убо согрешений ради нашихъ приключающихся болезнехъ на насъ и на царице нашей и на чадехъ нашихъ, и сия убо вся вменяху аки ихъ ради, нашего к нимъ непослушания сия бываху. Како убо воспомяну, иже во царствующий градъ с нашею царицею Анастасиею с немощною от Можайска немилостивное путное прехождение?[136] Единаго ради мала слова непотребна! Молитвы же убо и прехождения по святымъ местомъ, и еже убо приношение и обеты ко святыне о душевномъ спасение, и о телесномъ здравие, и о всемъ благомъ пребывании нашемъ и царицы нашея и чадъ нашихъ, и сия вся вашимъ лукавымъ умышлениемъ от насъ отнюдь взяшася, врачевстей же хитрости, своего ради здравия, ниже помянути тогда бяше.

И сице убо намъ в таковыхъ зелныхъ скорбехъ пребывающимъ, и понеже убо такова отягчения не могохомъ понести, еже не человечески сотвористе, и сего ради, сыскавъ измены собаки Алексея Адашова со всеми его советники, милостивно ему свой гневъ учинили,[137] смертные казни не положили, но по рознымъ местомъ розослали, попу же Селивестру, видевше своихъ советников ни во что же бывше, и сего ради своею волею отоиде, намъ же яко благословне отпустившимъ,[138] не яко устыдившеся, но яко не хотевшу ми судитися зде, но в будущемъ веце, пред агньцемъ Божиимъ, еже онъ повсегда служа и презревъ лукавымъ своимъ обычаемъ, злая сотвори ми; но в будущемъ веце хощу судъ прияти, елико от него пострадахъ душевне и телесне. Того ради и чаду его сотворихъ и по се время во благоденстве пребывати,[139] точию убо лица нашего не зряй. И аще убо подобно тобе хто смеху быти глаголетъ, еже попу повиноватися? И понеже убо до конца не весте християнского мнишеского устава, како подобаетъ наставникомъ покарятися, понеже бо немощни бысте слухи, требующе учителя лета ради, и понеже бысте требующи млека, а не крепки пищи, сего ради тако сия глаголетъ. И того ради убо попу Селивестру ничего зла не сотворихъ, якоже выше рехъ. А еже убо мирскимъ, яже подо властию нашею сущимъ, симъ убо по ихъ измене, тако и сотворихомъ: исперва же убо казнию конечною ни единому коснухомся, всемъ же убо, иже к ним не приставше, повелехомъ от нихъ отлучатися и к нимъ не приставати; и сию убо заповедь положивше и крестнымъ целованиемъ утвердихомъ; и понеже убо от нарицаемыхъ тобою мучениковъ и согласныхъ имъ наша заповедь ни во что же бысть и крестное целование преступивше, не токмо отсташа от техъ изменниковъ, но и болми начаша имъ помогати и всячески промышляти, дабы ихъ на первый чинъ возвратити и на насъ лютейшее составляти умышление; и понеже убо злоба неутолима явися и разумъ непреклоненъ обличися, — сего ради повинные по своей вине таковъ судъ прияли.[140] Се убо есть по твоему разуму «сопротивно разуму обретеся, разумевая», еже вашей воли не повинухомся? Понеже сами имуще совесть непостоятелну и крестопреступну, и малаго ради блистания злата премененну, се убо и намъ советуете. Сего ради реку: о, июдино окаянство сие хотение! От негоже избави, Боже, душа наша и всехъ православныхъ християнъ. Якоже убо Июда злата ради преда Христа, тако же убо и вы наслаждения ради мира сего православное християнство и насъ, своихъ государей, предали есте, души свои забывъ и крестное целование преступили есте.

В церквахъ же, яко же ты лжеши, сия несть было. Се убо, якоже выше рехъ, сего ради повинныя прияша казнь по своимъ винамъ, а не якоже ты лжеши, неподобне изменниковъ и блудниковъ нарицаеши мученики и ихъ кровь победоносну и святу, и намъ супротивныхъ силными нарицая, и отступниковъ нашихъ воеводами нарицаешъ; доброхотство же ихъ и души ихъ полагания за насъ — сия вся изъявленна есть, якоже выше рехъ. И не можеши рещи, яко и ныне облыгание есть, но сия ихъ измены всей вселенней ведомы, аще восхощещи, и в варварскихъ языцехъ увеси и самовидцовъ симъ злымъ деяниемъ можеши обрести, иже куплю творящимъ в нашемъ царствии и в посолственныхъ прихожденияхъ приходящимъ. Но сия убо быша. Ныне же убо всемъ, иже в вашемъ согласии бывшимъ, всякого блага и свободы наслаждающимся и богатеющимъ, и никая же имъ злоба первая поминается, в первомъ своемъ достоянии и чести суще. (...)