ОРИГИНАЛ

В лета 7090-го во дни благочестиваго царя и государя и великаго князя Иванна Василиевича всеа Русии приходил из Риму от папы посланник именемъ Антонъ и говорил государю от папы, что росийский род християня не в вере живутъ, не по проповеди евангельской и не по учению апостольскому, и прошал у господаря собора о вере поговорити и поучити. И ответъ государевъ: «О томъ нам от святых апостолъ и от святыхъ отецъ заповедано, что собору осмому не быти до пришествия Господня, егда явится в славе своей и воскреситъ всехъ, иже от века, и тогда открыются советы сердечныя, и явится вера и дела всех человекъ, кождо содея; а что твое учение, и ты подай намъ писмо, и мы поразсудимъ о томъ, велимъ к папе отписати».[498]

Не хотелъ убо бых тебе слова подати, якоже преже рекох ти, понеже испытования ради испытуеши, а не веры ради, якоже учими есми Господемъ нашимъ Исусом Христомъ, еже «Не дадите святая псомъ, ни пометайте бисеръ вашихъ пред свиниями»,[499] сииречь не давайте святаго слова псомъ невернымъ и не верующим Святому Писанию, божественаго слова пред ними не глаголати и божественных дохматъ не исповедати пред ними, яко сущимъ недостойным слышати о божественных словесех. Яко пси житие имуще, и своимъ лаяниемъ и злобою внутренняго человека поядающим и растерзающимъ, яко свиния в кале тимения валяющеся и въ сквернах пребывающе.[500] И сего ради не подобает бисернаго слова пред ними просыпати, да не токмо слова попираютъ, но и самого учащаго растерзают. И в толико в бесчестие превосходят, яко преже учения чесо сотвориша, сия по учении горчайшая сотворяют. И бывает спасение глаголъ вина погибели. И паки тойже божественный апостолъ Павелъ, къ Титу пиша, глаголетъ: «Еретика человека по единемъ и по второмъ наказании отрицайся, ведый, яко совратися таковый и согрешаетъ, сей самоосужен».[501] И сего ради убо хотехъ премолчати. И многих ради упражнения еже царскых правлений и еже ныне несть удобно о толиких беседований от Божественных Писаний указати истинну, понеже убо «мя постигнет повествующа лета».[502] Сего ради мало изреку, да не возмниши мя яко не ведуща, яковый яд излиялъ еси, или возмнится вамъ, яко не вемъ отвещати и не могу противъ вашихъ составити слова, и не ведуще Писания, или вашей прелестной тме повинувшеся и во унынии впадша, или сладостне ваше учение приемше, или несть во истинных християнехъ, еже о тайне христианстей истинну ведети. Сего ради вашего сомнения вмале изреку вамъ.

О вашемъ учителе Люторе,[503] яко убо в житии его имя себе прилично сочета. Воистинну бо Лютор, иже «лютъ», глаголется. Люто бо, люто, иже краеугольнему камени Христу[504] приражатися, и его божественныя уставы разоряти, и божественных его ученикъ и апостолъ проповеди разсецати, и священныхъ отецъ уставы превращати. И разно убо козньствующе всякое Божественное Писание и неистинно исповедуете. Якоже убо Сатанаил отверженъ бысть с небесе и вместо аггела светла тма и прелесть наречется, и аггели его бесове нарицахуся, тако убо и вы. Яко началникъ бесомъ и имя Сатана, тако и вашему началнику имя Лютор, якоже ангели его именуются бесове, тако и вы — кознодеи.[505] Яко рече избранный сосуд апостолъ Павелъ: «Не чудно бо, яко преобразуяся Сатана во аггела светла, тако и служители его, яко служителя правды».[506] Яко учитель нашъ Исус Христос рече: «Внемлите от лживыхъ пророкъ, приходящих къ вамъ во одеждах овчиихъ, волцы суть внутрь и хищницы. От плод ихъ познаете ихъ»,[507] сииречь от учения ихъ, кои от Бога есть и кое лестное учение (а не яко скажется учителемъ, имея одеяния смирения, внутрь дыхает злобою лукавых нечестивых учения). И яко во Иоанне реченное: «Не входяй дверми во дворъ овчий, но прелазя инуде, той есть тать и разбойникъ. А входяй дверми пастырь есть овцамъ. Сему дверникъ отверзаетъ, овца гласа его слышатъ».[508] Тако убо и вы чрез переграду божественнаго учения прелезше, и на учительскомъ месте ставше, и своим учениемъ Христовы словесныя овца, ихже искупи своею честною кровию, яко татие крадете и разбиваете, понеже убо дверми не внидосте ни коимъ повелениемъ. Яко убо дверник Христос рече верховному апостолу Петру: «Паси овца моя». И сия убо трикраты провозгласи трикратнаго ради отвержения и всемъ покаянию начало показуя,[509] еже вы спасение отвергосте. И паки инде глаголетъ верховному апостолу Петру: «И дам ти ключь Царства Небеснаго. Елико аще свяжеши на земли, связана суть на небесехъ. Елико аще разрешиши на земли, разрешена суть на небесехъ».[510] И по сихъ божественный апостолъ Петръ власть приим от всехъ владыкы Христа, тако и своимъ ученикомъ преподасть, и епископы по градомъ постави, сииречь посетители,[511] даже и до нас доиде. И сия убо дверми вшедше, и дверъникъ Христосъ отверзе имъ двери, и овца Христовы кождо по своей силе пасоша. Вы же, от самовольства вземшеися, и на учителство воскочисте, и дверми не внидосте, сего ради татие и разбойницы нарицаетеся. Сия убо дозде.

Нарицаешися именем християнинъ. Нас же Громовъ сынъ[512] научи:«Иже не исповедует Исуса Христа, в плоть пришедша, и сего учения не приносит, радоватися ему не глаголете. Глаголяй бо ему радоватися причащается делехъ его злых».[513] И по сему писанию ты несть християнин, понеже Христова учения развращаеши, а святыхъ апостолъ и святых отецъ учения отметаеши.

Да писал еси так, что будто ты учишь всякому християнину полную веру имети всемъ писмом святымъ, что сколко пророцы, и евангелисты, и апостолы научили и на писме подали, чудесы великыми запечатлели. И вы сами, что учите, то и разоряете, понеже убо вси уставы святыхъ отецъ развратисте и отвергосте. Господу нашему Исусу Христу во Евангелии глаголющу: «Шедше научите вся языки, крещаше их во имя Отца и Сына и Святого Духа, учаще ихъ блюсти вся, елико заповедах вамъ. И се аз с вами есжь вся дни до скончания века. Аминь».[514] Смотри убо сего, како обещевается «и до скончания века». Где убо ныне суть апостоли? Не якоже ли по его божественому словеси, идеже убо бяше труп божественаго его воплощения со Отцем седяй, тому бо божественнии орли апостоли собрашася.[515] Или убо ныне Христа несть с верными? Еже да не будет, но сего ради наведе и рече «до скончания века», а не рече «до скончания вашего». Они убо, яко добрии строителие благодати Владычне послуживше, на небесныя востекоша, радующеся. Господь нашъ Исус Христос смотрения исполнивъ тайну, пославъ божественыя ученики и апостолы на проповедь, и при них, и по них, и доселе пребываетъ съ верными, — и до скончания века, даже до втораго его пришествия, иже приидет судити живым и мертвымъ. По неложному обещанию с верными пребудет и якоже при божественней своей страсти плотскаго смотрения исполняет тайну, моля Отца своего о ученицех и о всемъ мире и рече: «Якоже мене пославъ иже в мир, и аз посла ихъ въ мир, и аз за них свещу себе, да и тии будут священнии воистинну. Не о сих молю токмо, но и о верующих словесе их ради въ мя. Да вси едино суть. Яко ты, Отче, во мне и азъ в тебе, да и тии в нас едино будут, и да мир веру имет, яко ты мя посла».[516] Видиши ли, каково величество святыхъ отецъ? И Господу нашему Исусу Христу молящуся Отцу своему не токмо о одних ученицех, но и о всех верующих словесе ихъ ради во нь. Да и ти въ них будутъ едино со Отцемъ и Сыномъ и Святымъ Духомъ неразлучно — не существомъ, но верою и заповедей Христовых совершениемъ и тамо сущихъ в Небесномъ Царствии благъ наслаждений. Сия убо яко Отецъ въ Сыне и Сынъ во Отцы сотворяют человекамъ з Богом быти и въ Бозе пребывати заповедей его исполнениемъ. В Марке же глаголетъ Господь: «Знамения верующим сия последуют: именемъ моим бесы изженутъ, языки возглаголют новы; змия возмут, аще и что смертно испиютъ, не вредит ихъ, на недужныя руки возложат и здрави будут».[517] Сия убо многая обрящиши божественными отцы сотворена. Святый Великий Василей, иже в Кесарии бывый архиепископъ, богоносному Ефрему Сирину дасть молитву отъ асирийска языка елински, иже глаголется гречески, глаголати.[518] Сия убо многа въ Божественномъ Писании, аще хощеши, многа обрящеши. Аще бы убо они неистиннии пастырие были и не дверми вошли паствы Христовы пасти, не бы таких евангельскых чюдес сотворили делом, яже Христос словомъ проповеда. И како убо вы веру всемъ писмом святыхъ учите держати, сами вся Божественная Писания развративше и отвергосте?

А что о чюдесех писалъ еси, и избранный сосуд апостолъ Павелъ къ коринфомъ в первомъ своем послании глаголет: «Знамения убо не вернымъ, но неверным, а пророчество не неверным, но верующим».[519] И аще бы есте верны были, и вы бы веровали Божественымъ Писанием, а не чюдесем дивилися. Яко во Иоанне реченно есть: рече Исус ко пришедшимъ къ нему июдеомъ: «Ищете мене, не яко видесте знамения, но яко яли есте хлебы и насытистеся. Делайте не брашно гибнущее, но брашно, пребывающее в животе вечнемъ».[520] Яко рече избранный сосудъ апостолъ Павелъ, ко евреомъ пиша, глаголет: «Бысть убо яко младенцы умом и бысть требующе млека, а не крепки пища. Всяк убо причащаяйся млеце, младенец убо есть, неискусен слову».[521] Тако убо и вы о чюдесехъ внемлете, яко о млеце, Писания силы не разуместе, яко крепкия пища. И паки тойже Павелъ, къ коринфом пиша, рече въ первомъ Послании: «Июдеи бо знамения просятъ, и еллины премудрости ищут. Мы же проповедаем Христа распята. Июдеомъ убо блазнъ, и еллином безумие. Самемъ званным, июдеом и еллиномъ, Христа, Божию силу и премудрость».[522] Сия убо дозде.

А что еси писалъ о 10-законии во 2-х книгах Моисеовых,[523] ино то есть и божественными апостолы отречено: разве едины две заповеди приемлются, еже «Возлюбиши Господа Бога твоего от всего сердца твоего, и от всея душа твоея, и от всея крепости твоея, и от всего ума твоего, и всемъ помышлениемъ твоимъ, и ближняго своего яко самъ себе».[524] И вы сами не совершаете. Богословецъ бо глаголетъ: «Глаголяй пребывати въ Бозе долженъ есть, яко Исус Христос Сынъ Божий ходилъ есть, и самъ тако ходити».[525] Вы же вся отвергосте и по своимъ ласкосердьством житие произведосте. А еже от прочихъ словесъ о 2-законии словесехъ, аще нужда ихъ держати, то нужда есть и обрёзоватися и вся Моисеова Закона блюсти (и сего ради жидовствующе являетеся, истиннымъ християномъ неподобно), — яже Христос своего божественаго плотскаго смотрения таинствомъ разруши и Новъ Завет законоположи. И якоже Богословецъ рече: «Яко законъ Моисеожъ данъ бысть, благодать и истина Исусъ Христомъ бысть».[526] Павелъ же о 2 законе, ко евреом пиша, глаголетъ: «Аще бы 1 законъ непороченъ былъ, не бы 2-му искалося место».[527] Сииречь новая благодать христианская аще убо и последи бысть, но обаче благодатию Христовою истинная явися, и сего ради 1-е речется. Стефанъ же 1 мученикъ, на исповеди стоя, в Деянии апостольских о 2-законии рече: «Иже приасте законъ повелениемъ аггелъ и не сохранисте».[528] Павелъ же избранный сосудъ, ко евреомъ пиша, глаголетъ: «И Моисей убо есть веренъ во всемъ дому своем, яко угодникъ во свидетельство глаголанным. Христос же яко сынъ в дому своемъ. Домъ его мы есмы».[529] Сего ради не подобаетъ истинным християном евангельское учение претекати, во 2 законе полагати, еже есть отступление бедно, и со июдеи Христа распинати начинати. О обрезании Павелъ, къ галатомъ пиша, глаголетъ: «Яко аще обрезаетеся, Христос вамъ ни в кую ползу есть».[530] Сего ради, мало или велико слово приемля о 2-законии кроме евангельскаго учения, Христа отвергъся еси. А иже писалъ еси о вере, о молитве и о службе Божии, смешалъ еси службу со крестомъ, и о вечери Христове, и что еси писал главами от Матфея, и мы от апостольскаго проповедания и от отецъ предания вемы и како сия подобает творити. А спрашивали есмя тебя, чтобы ты намъ то известилъ, како то ты творишь и учишь. И ты намъ того не оказал. Сия убо дозде.

Се же писалъ еси, Адамскаго ради преступления вси ражаемся подъ завесою плоти и смертию осудихомся. Ино сего ради Богъ Слово плоть бысть и вселися в ны.[531] Восхотевъ Богъ помиловати заблуждшаго человека, человекъ быти сподобися от пречистыя Девы Мария. Понеже убо царствова смерть от Адама до Авраама, от Авраама до Моисея, а от Моисея до воплощения Христова. И не на согрешших царство смертное се, иже убо и праведнии и до Христова воплощения смертию осуждени быша и во адъ идяху. По Христове воплощении сего дрьзновения смерть не имеяше, понеже убо Богъ нашъ Исус Христос обновив путь новъ и удобенъ и делающимъ во благое и верующимъ въ правду во спасение. Ныне убо смерть никакойже власти имеяше, но яко убо вси праведнии, яко сномъ уснувше, къ вечному царствию преходятъ. Ни воздушныя духи не возмогутъ ихъ удержати, понеже убо добродетелми сиящи, светлейши солнца явися, и никако возмогутъ удержати противнии дуси, понеже убо въ нихъ не имущи своего обрести. Якоже убо рече Господь нашъ Исус Христос во святемъ Иоанне евангелисте: «Грядетъ убо мира сего князь и во мне не имать ничесоже».[532] Тако убо и сии последоваша по стопамъ Христовымъ, и князь мира сего не обретаетъ ничесоже. И сего ради на нихъ смерть царства не обретает. А иже самоволно предаша себе князю мира сего и прелести его последоваша, сии убо своеволне впадаютъ, подъ царство смертное подкланяются, и зде горестию душа зле от тела разлучаются, и тамо бесконечныя муки приемлют. Понеже убо Господь нашъ Исусъ Христос сотвори человека самовластна, яко и Адамъ преже бысть преступления, последующе стопамъ Христовымъ. Адамьское преступление праведныхъ жителствомъ разрешается, и смерьть на них никоеяже власти имеет. Согрешившимъ или отступникомъ не токмо Адамское согрешение на них взыскуется, но и приложение своея злобы, и сугубо от своего согрешения мучатся. На сих убо царьствует смерть, яко и преже, к симъ и заповедей Христовыхъ несохранение на нихъ испытуется. А еже к римлянеж в Послании: «Еже повинни быхомъ, июдеомъ и еллиномъ, всем под грехомъ быти».[533] Но выше писано, яко: «У Бога несть разньствия лицу».[534] Якоже тойже святый апостолъ Павелъ пиша, глаголетъ: «Несть разньствия у Бога. Варваръ и скифъ, рабъ и свобод, мужский полъ и женский — вси едино есть о Христе токмо делы благими».[535]

А что писалъ еси, что ни единъ себя ничимъ избавити не можетъ своими ученьми и делы благими, и указал еси в римленьском Послании и къ галатомъ: «И делающимъ мужемъ мзда не вменяется по благодати, но по долгу, а не делающему, верующему во оправдающаго нечестива, причитается вера его въ правду».[536] Что убо, ко евреомъ пиша, глаголетъ? «Праведный верою живъ будет. И аще обинется, не благоволит душа моя о немъ. Мы же несмы обиновении в погибель, но в вере во снабдение души. Есть вера надеемымъ вещемъ составъ, обличение невидимьшъ. В се бо свидетельствовани быша старцы. Верою разумеваем совершитися векомъ глаголомъ Божиимъ, во еже не от видимых видимымъ быти. Верою множайшу быти жертву Авель паче Каина принесе Богови, еяже ради свидетельствованъ быти праведенъ быти. Верою зовомъ Авраамъ послуша изыти въ место, иже хотяше прияти в наследие, изыде, не ведый, камо грядетъ. Верою и сама Сарра силою возложениемъ семени прият и во время старости роди. Верою Моисей, великъ бывъ, отврьжеся нарицатися сынъ дщери фараоновы, паче изволи страдати с людьми Божиими, нежели имети временнаго греха сладость. Больши богатство въменивъ египетскихъ сокровищь поношение Христово, взираше бо на мздовоздание. Верою оставивъ Египта, не убоявся ярости царевы, невидимаго бо яко видя, терпяше».[537]

Что убо во Ияковли Послании соборномъ глаголетъ: «Кая полза, братия моя, аще веру кто глаголетъ имети, дела не имать? Егда бо можетъ вера спасти его? Аще ли братъ и сестра нага будета и лишена будета дневныя пища, рече кто има от васъ: "Идета, греитася и с миромъ насыщаитася", и не дасть има требования телеснаго, кая полза? Сице и вера, аще делъ не имать, мертва есть о себе. Но речетъ кто: Ты веру имаши, азъ дела имамъ; покажи ми веру твою от делъ твоихъ, и азъ тебе покажу и от делъ моих веру мою. Ты веруеши, яко единъ Богъ есть, добре твориши; и беси веруют и трепещутъ. Хощеши ли разумети, о человече суетне, яко вера без делъ мертва есть? Авраамъ отецъ нашъ не от делъ ли оправдася, вознесъ Исаака сына своего на олтарь? Видиши ли, яко вера поспешествоваше деломъ его, и от дел совершися вера? И совершися Писание глаголюще: "Верова Авраамъ Богови и вменися ему в правду, и другъ Божий наречеся". Зрите ли убо, яко от делъ оправдается человек, а не от веры единоя?»[538] А что убо сотворим апостолом симъ, Павлу убо, пишущу о вере, Иакову — о деле? Или мниши, яко распря бе въ нихъ? Ни, но великаго согласия. Единъ убо подтвержаше дела, друзий утвержаше веру. Обема совершитися во едину бо ползу ко спасению человеком по вере и деломъ. И сего смотри Павла апостола, веру исповедающу и дела утвержающу. Аще бы Авель жертвы не соделалъ, не бы свидетелствован праведенъ. Аще бы Енохъ не преставленъ бысть, не бы веренъ был. Аще бы Ное ковчега не сотворил, не бы веровал. Аще не бы Авраамъ на землю обетованную не пришел, не бы веровал. Аще бы Сарра не родила Исаака, не бы веровала рожению семени. Аще бы Аврамъ Исака на заклание не привел, не бы веровал, яко от мертвых воздвигнути силенъ есть Богъ; темъже ино того прият, и друг Божий наречеся.[539] Смотри и самого апостола Павла, писа о делех: «Идеже умножися грех, преизбыточьствова благодать. Но яко царствова грехъ смертию, тако и благодать воцарится правдою в жизнь вечную Исусом Христом Господемъ нашимъ. Что убо речемъ: да належимъ ли гресе, да благодать умножится? Да не будетъ. Имже убо умрохомъ, како паки оживемъ о немъ? Или не весте, яко елицы во Христа Исуса крестихомся, во смерть его крестихомся? Яко да воста Христос от смерти со славою Отчею, тако и мы во обновлении жизни ходити начнемъ».[540] Видиши ли, яко делы благими угожати Богу?

А еже, обращая, глаголеши свыше и долу, яко чрез единаго Господа Бога нашего Исуса Христа начало спасения человекомъ, и сего ради обегаеши отеческаго предания, неразумия глаголеши, ни о немже утверждаешися. О семъ бо глаголетъ Писания тако, яко «Начала никто можетъ положити паче лежащаго, иже есть Христос»,[541] и еже есть основания веры узаконоположения, делом исправления во християнстве. Апостоли и отцы, яко предобрии наставницы руководствующе къ Божию повелению, не сведущемъ таиньство открываютъ и Богови наставляютъ. Якоже апостолъ Павелъ пиша к Тимофею: «Возмагай о благодати, яже о Христе Исусе. И яже слыша от мене многими свидетели, сия предаждь вернымъ человекомъ, и доволни будутъ и иныхъ научити».[542] Видиши ли, яко повелевает вождемъ и наставникомъ быти и иных научити? И вси убо вожди и наставницы не на своемъ основании пологаху, но ко Христову основанию вся приводяша, начало убо Христос. И апостолъ Павел, к коринфомъ пиша, глаголетъ: «Богу бо есмы поспешницы, Божия стяжания, Божия здания есте. По благодати Божии, данней мне, яко премудръ архитектон, основание положих, ин же назидает; кождо же да блюдет, како назидает. Основания бо никтоже не может положити, паче лежащаго, иже есть Христос».[543] И паки, к Тимофею пиша, глаголетъ: «Благодать имамъ укрепльшему мя Христу Исусу Господу нашему, яко верна непщева положити в службу, иже первие суща хулника, и гонителя, и досадителя, но помилован бых, яко неведый сотворих, въ неверствии; упреумножися благодать Господа нашего верою и любовию еже о Христе Исусе».[544]