Сия убо ходатай есть Господь Исусъ Христосъ к Богу и Отцу о людех. Еже плотскаго смотрения свершениемъ Адамский грехъ разрушается. И еже до крещения неведый кто что сотворит, сия убо очищаются благодатию Христовою и, яко новорожденным младенцемъ, еже от божественнаго крещения от купели исшедше, всякого греха на себе не имуще будет по крещении и вся заповеди долженъ есть хранити. Аще ли же не сохранитъ, и ничто убо ему ползует, согрешившу, Христово воплощение. Аще бы Владыка о рабехъ сицевая пострада, како мы не хотимъ о Владыке пострадати и заповеди соблюдати и совершати! Господу нашему Исусу Христу глаголющу: «Аще кто служитъ мне, и мне да последствуетъ».[545] И паки: «Не всякъ, глаголяй ми, Господи, Господи, внидетъ во Царствие Небесное, но творяй волю Отца моего, иже есть на небесех».[546] Видиши ли, како не велит ленитися делати дела благаа? И паки инде рече: «Аще не преизбудетъ правда ваша паче книжник и фарисей, и не внидете во Царствие Небесное».[547]

О галатех писал еси сия, самъ славу свою разрушаеши. Сия убо писано о 2-мъ законии, отрицая 1 Моисеовъ закон, иже ты притекаеши. А еже писал еси, яко Иванк Предтеча показуя перстом и глаголетъ о Сыне Божии: «Се агнецъ Божий, вземляй грехи всего мира»;[548] и се выше писах ти. Боюся много глаголати, да не со Июдою осужденъ буду, поведая врагомъ тайну. И якоже рече божественый апостолъ Павелъ, пиша к филиписеомъ: «Много глаголах вам. И ныне, плачя, глаголю о вразех креста Христова. Имже бог — чрево, и слава — во студ имъ, и земная мудрствующе».[549] Паче навожу тричисленых отрокъ гласа ко Навходоносору царю:[550] «Есть Богъ силенъ на небеси, и может нас избавити от пещи, огнемъ горящия, аще ли ни богомъ твоимъ не служимъ и телу златому, еже постави, не покланяемся».[551] Хощу бо ваше нечестие препрети молчаниемъ, яко и Христосъ Пилата и архиереи,[552] неже долгими словесы. Се есть неудерьжание сластемъ и работати чреву и подпупию, еже вы на беззаконный брак разрешисте.

А что писал еси о воплощении Слова Божия, еретичествуя, что почался Сынъ Слово Божие от пречистыя Богородица, ино апостолъ, пиша, Павелъ к филиписеомъ глаголетъ о семъ: «Се убо да премудрствуется в вас, еже о Христе Исусе, иже во зраце Божии, не восхищениемъ непщева быти равенъ Богу, но себе излия, зрак раба прием, въ подобии человечестемъ быв, и образомъ обретеся яко человекъ».[553] Видиши ли, яко не ин, воплотивыйся от Присно Девы Мария, соприсносущное его Слово Божие Отцу и Духови, воплотившейся на спасение наше, заимствова плоть от Пречистыя и Приснодевыя Мария, той единъ Отца Сынъ собезначален, и единороден, и от Приснодевыя Мария воплотивыйся на спасение. «Яко всяк младенецъ мужска полу разверзает ложесна, свято Богови наречется».[554] Совершенъ Богъ и человекъ.

А еже о страсти Христове, и воскресении, и о вознесении, и о седении одесную Отца, мы вемы. А ты како веси, ни писал еси. Еже посредство имеетъ Христос о нас, и, яко рече апостолъ Павел, еже всегда проповедати о нас,[555] ты убо како чтеши? Аще веруеши апостолским преданиемъ, въ коемъ чину ихъ самих положиши и како имъ почесть воздаси, иже таковую тайну намъ открывше и на таковый путь истинный наставившимъ и научившимъ? Кую почесть имъ подобаетъ творити!? Аще убо златокузньца обрящеши, или землемерителя, или архитектона, философию исправляюще, или строение зданиемъ строящи, или каменосечьца, или какоя иная земная мудрования, како учителей и наставников сихъ почтемъ, яко открывшемъ намъ премудрость и жительству строения преподавшу. И аще убо сии о тленномъ и мимотекущемъ мудровании подобнимъ честемъ мздовоздаания восприимут, — въ ваших странах златокузньцы и среброкузньцы, аще кое строят дело работу, противу состоянию делу приемлетъ множайшее сугубо, — и аще убо таковы сии достойнии почести таковым, како же не почтем убо ко благочестию насъ наставляющих, и благоразумия разумъ намъ открывающе, и уруководствующе ко Христу! Аще и по твоему слову, яко написанному, веровати? И аще бы не написаны бысть были Евангелия, како убо быша разумели Божия Слова смотрения? Аще бы апостоли не бысть учили и послания не бысть писали, како убо разумели Слово Божие, къ человекомъ схожения и къ Богу человекомъ возведение? Како убо не суть божественнии апостоли и святии отцы достойны чести, и покланянию, и похвалению, иже таковый свет просветивше душа наша, и данный имъ талантъ Господемъ умножившим, и мног прикупъ сотворившим!? Мы же, истиннии християне, веруем, яко ходатай есть к Богу, и начало спасению, и посредникъ о людех Христосъ Богъ наш к Богу и Отцу. Емуже, яко здания и раби суще, и страстию его спасени быхомъ, со Отцемъ и с Пресвятымъ Духомъ во едином существе и во триехъ лицехъ покланяемся, и молимся, и славословимъ, и превозносимъ его во веки, и просимъ отпуста греховъ и Царствию Небесному наследия, и полезная душамъ и телесемъ нашимъ, яко Богу, и Царю, и Создателю, всем, и вся въ руце свои содержащу. Пресвятей, пречистей и присно деве Марии, яко сподобльшейся таковей тайне послужити, и огнь Божества во своих ложеснахъ неопално приимши, вместивши намъ невместимаго Бога, еюже къ Богови примирихомся, и вражда, иже от Адама, от Бога разрушися, и яко Матери всехъ, Владычице и Богородице, яко матерне дерзновение к нему стяжавши и недостаточная наша благодатию Христовою наполняющи. Якоже рече божественный апостолъ Павелъ: «Сила бо Христова в немощи совершается».[556] Сей убо, яко заступнице и предстателнице всего роду христианскаго, молимся и просимъ помощи, да умолит Творца своего и Сына и Бога нашего о наших согрешении, да подасть намъ Христос Богъ нашъ ея молитвами спасение получити и будущих благъ наслаждения прияти.

Апостоловъ не боготворим, не буди то, яко самъ апостолъ, пиша, глаголетъ: «Аз насадих, Аполос напои, Христос возрастит. Темъ ни насажаяй, ни напаяй, но возращаяй».[557] Тако убо и мы божественныхъ апостолъ почитаемъ, яко Слова Божия ученики и посланники, нашему спасению наставники и руководители. Сего ради молимся имъ и призываем въ помощь, да яже они написаша и научиша, сия убо разумнейша разумеваем и их спасению нашему спомощникы имамы. Тако и святыя отцы, яко наставникы и учители ко истинне и благочестию. Тако и святыя страстотерпца почитаемъ, яко о истиннб благочестия пострадавше, и ихъ ревностию вооружаяся, благочестия совершаемъ. Преподобныя, яко совершителя апостолскому учению, и сих ревнующе, сами на путь благочестия направляежся. Сице убо мы веруем, яко единъ ходатай Господь нашь Исус Христос; пречистая его Богомати — всехъ Владычице, и ходатаице, и заступление всемъ християномъ; сия вси апостоли, пророцы, и святители, и вси святии, яко служителе правде и намъ наставницы, и Христу приводящу, почитаются, сего ради и мощемъ их поклоняемся, да болшую помощь от нихъ обрящемъ. И якоже рече Господь нашъ Исус Христос: «Несть ученик над учителем своимъ. Совершен всяк будетъ, яко и учитель его».[558] Видиши ли, яко не велитъ взиматися над учителемъ, но последствовати учителю. Но якоже рече божественный апостолъ Павелъ: «Комуждо дается явление Духа на ползу. Овому убо Духомъ дается слово премудрости, иному слово разума о том же Дусе, другому вера темъ же Духомъ, иному дарования исцелением о том же Дусе, другому действия силамъ, иному пророчество, другому разсуждение духовомъ, иному роди языкомъ. Вся сия действует единый той же Духъ, разделяяй на власти комуждо, яко хощет. И, яко бо тело едино есть, и уды имать многи, вси уды единаго тела, мнози суще, едино суть тело. Тако и Христос. Ибо едином Духомъ мы вси во едино тело крестихомся, аще июдеи, аще ли еллини, аще раби, аще свободни, вси бо единымъ пивомъ напихомся. Ибо тело несть един удъ, но мнози. Аще речет нога: несмь рука, несмь от тела, но сего ли ради несть от тела? И аще речет ухо, яко несмь око, несмь от тела, ни от сего ли несть от тела? И аще все тело око, где слух? Аще все слух, где ухание? И ныне положи Богъ уды, единаго кождо в телеси, якоже восхоте. Аще ли быша вси един удъ, где тело? И ныне положи мнози удове, едино тело. Не можеть око рещи руце: не требе ми еси; или паки глава ногама: не требе ми есте. Но много паче мнящеися уди тела, немощнейше быти, нужнейши суть, яже мнимъ нечестнейша быти телу, симъ честь множайшу облагаемъ; и неблагообразни наши благообразие множайше имутъ, а благообразнии наши не требе имут. Но Богъ раствори тело, лишающемуся болшую дастъ честь, да не будет распря в телеси, но тожде въ себе пекутся уды. И аще стражетъ единъ удъ, с ним стражютъ вси уди. Вы есте тело Христово, и уди от части. И овех убо положи Богъ во церкви, 1 апостолы, 2 пророкы, 3 учителя, потом силы, таже дарование исцеления, заступления, кормителя, роди языкомъ. Еда вси апостоли, и пророцы, и учители? Еда вси силы деютъ, вси дарования имуть исцеления? Еда вси языки глаголют?»[559]

Над се убо указах ти доволно, како подобает почитати богоносныя апостолы и священныя отца. А еже писал еси, что о ходатайстве Божии и о имени, еже несть спастися о иномъ имени развее о имени Господа Исуса Христа, и отпущения грехомъ о имени его, живот вечный, и мы веруемъ тако, но токмо сими ученики его, и апостолы, и богоносными отцы к сему приводимся и на истинный путь наставляемся. А еже о началех глаголалъ еси, ино сами апостоли того не написали о своих началех — спасению человекомъ быти, — да едино начало Христово они убо, яко служители благодати Владычне, распространиша и устроиша на основании и начале Христове. А еже писалъ еси, что грехи по благодати отпущают даромъ, а не делы сопряжны, и недостаточная благодатию наполняемы, аще не делы грех изыдетъ, слыши Господа, во святомъ Евангелии глаголюща: «Аще кто не оставит отца своего и матерь, жену и чада, села и имения и не отвержется себе всего, еще и душа своея, не может быти мой ученикъ. И аще не возметъ кто креста своего и вослед мене грядет, несть мене достоинъ».[560] Крестъ есть, еже распятися мирови, яже суть в мире. Распятие се есть — мирьскаго всякаго хотения остатися: сел, и имения, и богатьства, пища, и пития, и ничего требовати и не избирати, разве удовлятися по прилучаю случающимися, и сия с воздержаниемъ великымъ, и крепостию, и молитвою непрестанною. И к сему любити враги и вся оскорбляющая, и молитися за творящих напасть, своя вся, аки не сущая, презирати и не пещися ими, но токмо непрестанное молитва, постъ и заповедемъ Господним сохранение со спасениеж. И зде яко пришельцы, яко рече апостолъ Павел, но тамо будущаго повсегда желающе,[561] и к вечнымъ онемъ селениемъ преселитися хотяще, и ничто о здешних желающе. Сице крестъ свой взимати и распинатися мирови, по Исусе ходити.

А что еси писал, что Богъ Отецъ для заслуги Сына своего приимъ человека в милость свою и грехи отпущает даром, и то еси писал ересью Ариевою,[562] понеже повинна написал еси Отцу Сына. Громовъ сынъ нас научи: «Въ начале бе Слово, и Слово бе к Богу, и Богъ бе Слово. Се бе искони къ Богу. Вся темъ быша, и без него ничтоже бысть, еже бысть».[563] Видиши, яко собезначален Сынъ Отцу, и любве ради и имея составъ Отецъ къ Сыну неразделный и неслиянный по Богословцу. Яко и во святомъ Иоанне евангелисте речено бысть: «Глаголы, яже аз глаголю вам, о себе не глаголю, Отецъ во мне пребываяй, и той творит дела. Веруйте мне, яко аз во Отцы и Отецъ во мне». «И аще чесо просите от Отца о имени моемъ, то и сотворю, да прославится Отецъ въ Сыне». «Имеяй заповеди моя и соблюдая их, той есть любяй мя, а любяй мя, возлюблен будет Отцемъ моимъ, и аз возлюблю его и явлюся ему сам».[564] И паки речено есть: «Отецъ любитъ Сына и вся показует ему, яже самъ творит. Яко Отецъ воскрешаетъ мертвыя и живит, тако и Сынъ, ихже хощетъ, и живит. Отецъ бо не судитъ никому, но суд весь дасть Сынови, да вси чтутъ Сына, якоже чтут Отца, пославшаго его».[565] Послание разумей не уничижениемъ, но едину волю и хотение Отца и Сына и Святаго Духа. Но единъ от Троица Сынъ Слово Божие съ плотию смотрениемъ тайны своея человекомъ спасение содела со Отцемъ и Святымъ Духомъ. Идеже бо есть Сынъ, ту и Отецъ, и Духъ, и где Духъ, ту и Отецъ, и Сынъ. Якоже рече во святомъ Евангелии: «Егда приидет утешитель, егоже аз послю вамъ от Отца, Духъ истинный, иже от Отца исходит, той свидетельствуетъ о мне».[566] Видиши ли Отца безлетна и собезначална Сына, соприсносущна Пресвятаго Духа? Едина слава, честь и держава, едина воля, и хотение, и сотворение, Святыя Троица. И паки помале наводит, глаголя: «Егда приидетъ онъ, Духъ истинный, наставит вы на всяку истинну. Не от себе бо глаголати имать, но елика аще услышит, глаголати имать, и грядущая возвеститъ вамъ. Той мя прославитъ, яко от моего приимет, и возвеститъ вамъ. Вся, елика имать Отецъ, моя суть, сего ради рех, яко от мене прииметъ, и возвестит вам».[567] Видиши ли едино существо, яко Сынъ посланъ волею от Отца и своимъ хотениемъ и действомъ Пресвятаго Духа спасение человекомъ содела. Тако и Духъ не имать от себе глаголати, но со едино хотение со Отцем и Сыномъ, ино послание Сынове плотному смотрению разумеваемъ. Паки же о единосуществе и собезначалстве Сыну ко Отцу во Иоанне речено есть: «Сего ради мя Отецъ любит, яко яз душу свою полагаю, да паки прииму ю. Никтоже возметъ ю от мене, но азъ полагаю ю о себе. Область бо имам положити ю, и область имамъ паки прияти ю. Сию заповедь приях от Отца моего».[568] Видиши ли, самовластво и собезначальство ко Отцу? И не требующу никогоже воставити его от мертвыхъ, но самовластно воскрешаетъ из мертвыхъ. Якоже рече избранный сосудъ Павелъ: «Не восхищениеж непщева быти равенъ Богу, но себе излия, зракъ раба приимъ»,[569] и прочая. Егда Лазаря воскреси, и пришедъ, надъ него рече: «Отче, хвалу тебе воздаю, яко услыша мя. Азъ ведех, яко всегда мя послушаеши, но народа ради, стоящаго окрестъ, рехъ, да веру имуть, яко ты посла».[570] И паки рече Исус: «Аще кто любитъ мя и слово мое соблюдетъ, и Отецъ мой возлюбит его, и к нему придеве, и обитель у него сотвориве».[571] Видиши ли, везде равновластие, а не повиновение. И паки рече Исусъ: «Отче, прослави Сына своего, да Сынъ твой прославит тя».[572] И ина многа обрящеши в Божественном Писании о семъ свидетельствующе, яко равночестенъ есть Сынъ Отцу, а не служебенъ. Сия убо дозде.

Се же писал еси, чему приидетъ зде убо Господь нашъ Исус Христос судить живымъ и мертвым, ино о томъ о всемъ выше сего писано, а ты не гораздо выразумелъ. Мы тобя воспросили в томъ, како веруеши Суду быти Божию, о востании мертвыхъ. Иное заговорилъ, а о томъ не писал еси. А что писалъ еси, что зовете не то ученики добрые, что человекъ самъ се вымыслитъ, и то еси писалъ на апостолы и на святыя отца, и о томъ писано выше сего. А еже о Десятословии писалъ еси, выше речено есть. Аще приимаеши Законъ Моисеовъ, тогда подобает ти и суботствовати по-жидовски,[573] о немже вся вмале выше сего рекох ти совершено, и многословити съ тобою не хощу, якоже со псомъ, врагъ бо еси креста Христова. А что пишешь по главамъ во Апостоле и во Евангелии, ино наши главы с вашими главами не сходятся,[574] потому что вамъ Люторь тако указал; а иное лжешь. А что еси писал во Евангелье в Матфее: «Что мя хвалите помышлениемъ человеческымъ», и то в Матфее не описано, а писано въ Луце, да не также, какъ ты писалъ, а написано въ Луце так: «Что зовете мя, Господи, Господи, и не творите, яже глаголю».[575] И ты — врагъ креста, и посреде пшеницы плевелы сеешь,[576] и лжу на истинну претворяеши. Якоже рече Господь во Евангелии: «Вы отца вашего диявола есте, и похоти отца вашего хощете творити. И егда ложь глаголет, от своих глаголет; яко ложь и отецъ его есть».[577] А что писал еси, что апостолъ Павелъ пишет к коринфомъ, яко «Царствия Божия не наследятъ ни блудницы, ни идолослужители, ни прелюбодеи, ни малакия, ни мужеложницы, ни татие, ни лихоимцы, ни пьяницы, ни досадители, ни клеветницы, ни хищницы»[578] — и то все у вас творится, у люторовъ. А что идолослужение вы, лютори, прилагаете ко иконному поклонению, и тому пространнейша напреди слово явитъ. А иное писалъ еси, лжучи, чего во Божественномъ Писании нетъ. Сия убо дозде.

И что еси писал о Лютореве учении, что вы веру свою покладаете на самомъ Христе Господб нашимъ, а не на Люторе, а что бы Люторь, а любо иный кто, науку свою показал. Что и Святымъ Писмомъ сложно, то и науку должни приимати вы, яко от самого Бога. А есть бы кто противъ той науки Господа нашего Исуса Христа, евангельска и апостольска, кто научал, аще бы и аггелъ с небеси, того проклятого бы судилъ. Слыши, что апостолъ глаголетъ о томъ, что писал еси. Та бо глаголет: «Чюжду же бо, яко тако скоро прилагаетеся от звавшаго вы благодатию Христовою во ино благовествование, еже несть ино, аще бо не нецыи смущающеи вы и хотяще превратити благовествование Христово. Но и аще мы, или аггелъ съ небеси благовеститъ вамъ паче, еже благовестихом вамъ, анафема да будетъ. Но яко преди рекохомъ, и ныне паки глаголю: аще кто вамъ благовеститъ паче, еже приясте, анафема да будет. Ныне убо человеки препираю или Бога? И ищу человекомъ угожати? Аще бо единаче человекомъ угожал бых, Христу раб не бых был. Сказаю вам, благовествование, благовещеное от мене, яко несть по человеку, ни аз бо от человекъ приах е, ни научихся, но явлениемъ Исус Христовымъ».[579] Видиши ли, яко ни своимъ хотениемъ, ни своимъ смышлениемъ проповедь благовестити, ни паки что от себе мысли. Аще что сложно Божественому Писанию, ничто от себе помысли, якоже вашь Люторь и с вами кознодеи. Но Павел явлением Исус Христовымъ благовести и основания своего не положи паче лежащаго, иже есть Христос. Слыши, тойже Павелъ глаголетъ, коринфомъ пиша: «Основания бо иного никто может положити паче лежащаго, еже есть Христос. Аще ли кто назидает на основание семъ и злато, и сребро, камение честно, древа, сено, отростие, — комуждо дело яве будетъ, день бо явит имъ».[580] Видиши ли, яко основание паче лежащаго, еже есть Христосъ, никто может положити.

Христос посла по воскресении своемъ божественыя своя ученикы и апостолы на проповедь, глаголеть: «Шедше научите вся языки, крестяще их во имя Отца и Сына и Святаго Духа, учаще ихъ блюсти вся, елика заповедах вамъ».[581] Видиши ли, яко повелевает блюсти повеленная, написаная? Якоже Громовъ сынъ глаголет: «Суоть и ина многа сотвори Исусъ пред ученикы своими, яже не суть писана въ книгах сихъ. Аще по единому писана бывают, ни самому, мню, всему миру вместисти писаных книг».[582] Не послушающих апостольских поучений и неповинующихся, слышиши, что в Луце глаголетъ: «Послушаяй васъ, мене слушает, отметаяйся вас, мене отметается».[583] Апостоли же на проповедь исшедша, воставиша в свое место наместницы апостолы 70, по них и святители, даже и доселе по преданию рода духовна достигоша, от нихже и священницы, иже наставницы человекомъ. Яже Павелъ, к Титу пиша, глаголетъ: «Чадо Тите, сего ради оставих тя въ Крите, да некончанная исправиши и поставиши по всех градех попы».[584] И аще бы не нужно се было христианомъ, не бы апостолъ о семъ писалъ. Вашего же Лютора и васъ кто на се поставилъ? Паче же не токмо не истиньствуете, но паче развращаете. Якоже рече верховный апостолъ Петръ во втором послании, сице глаголя: «И яко, — рече, — возлюбленный брат наш Павелъ по данней ему премудрости написа вам, яко и во всехъ своихъ посланиихъ, глаголяй въ них о сих, въ нихже суть неудобь разумна некаа, иже ненаучении и неутвержении развращают, яко и прочая писании, к своей погибели имъ».[585] Основание выше рехъ, яко «Кто назидаетъ на основание злато, сребро, камение честно» — сииречь дела благия; «дрова, сено, трость» — худейшая дела и грешная. Видиши ли, в кую пропасть снидосте, яко Петръ глаголетъ, иже развращати Писания, и яко вы развращаете по своему хотению. Павел же глаголетъ, яко «основание никто может положити паче лежащаго, иже Исус Христос». Вы же, притекше священникомъ, притекше учителемъ инемъ, тоже и святителемъ и апостолом, самое Христово повеление развращаете, вспропинающе въ себе Христа Исуса, и самовластне учите. И еже апостолъ, пиша к галатомъ, глаголет: «Яже и аггела не послушати, паче, еже и приясте».[586] Вы же предание апостольское все отвергосте, сего ради по апостолу сами себе проклинаете. Темже и мы, яко врагомъ истинны и нечестию поборникомъ праведенъ судъ, проклятию наводимъ, яко люди есте Антихристовы, еже есть Сопротивника.

А что еси писал о руской вере, ино как Богъ, просветилъ прародителя нашего благочестиваго великаго князя Владимира, нареченнаго во святом крещении Василия, — крестися во имя Отца и Сына и Святаго Духа, ныне и присно и во веки векомъ, аминь, — от тех местъ и доселе не нарицается руская вера, но християньская. Темже и повсюду вселенныя, аще где християнска вера истинная, ту християне зовутся, а идеже зовутся иным именемъ, которые земли, по прозвищу имя, ту ересь и расколъ, а не истинная вера. Яко рече божественный апостолъ Павелъ: «Аще во языцехъ бози мнози и господие мнози, но намъ единъ Богъ Отецъ, из него вся, и мы у него. И единъ Господь Исусъ Христосъ, имже вся, и мы темъ. И единъ Духъ Святый, в немже всяческая, и мы въ немъ; едино крещение и едина вера. Аще языцы повсюду веруют и жрут, мнящеся Богу, но бесомъ веруют и жрут».[587] О семъ убо во Троицы славимому Богу молимся прилежно, да соблюдетъ нас от неприязни тмы неверия вашего и все православне християнство Руския земли.

А еже убо что видиши от слабых и ленивых, не вся заповеданная исполняющих, сия ни закону оиисующу, ино онехъ небрежениемъ. Сия убо недостаточная, яже в немощи Христосъ благодатию навершаетъ. Аще ли по благодати нечювствены пребывают, сами на своя главы неотреченыя Божия гнева суд приносятъ. А что писал еси о церкве, иже вы не затворяете до одного народа, языку, али бо месцу на свите, ино християнская соборная и апостольская церкви едина есть. Аще и во едином месте, во граде, или веси, или повсюду вселенныя, аще много церквей, и уставъ един имеют. А что писалъ еси о латынской церкве, и аз о томъ не хощу много глаголати, понеже, яко латыни — прелесть, тако и вы — тма. Аще бо кто некоего изведетъ ис темницы, темны суща и несветлы, во друзей темне и мрачне затворит, что убо ползова? Но прелесть, а не истинна. Искомое бо себе, еже от тмы на свет извести. Аще ли паки тме наследника сотвори, прелестникъ есть, а не истиненъ. Сия убо дозде.

А что писалъ еси о Люторе, како он во учение вшел, будто справедливе сказуетъ, и о томъ много обличихомъ выше сего, яко вся развращенна вашего Лютора учения и ваша прелесть. Яко Сатана з бесы повсюду человеки прелщаютъ, тако и вы способствуете бесовстей прелести. А о латынской церкве выше сего указахомъ. А что Люторъ будто от собора християнскаго выбран на тот уряд, и ты б намъ о том ведомо учинил, от кого онъ выбран, и кто его ставил, и въ каком онъ урядстве был: апостолъ ли или епископъ. Апостолъ бо Павелъ пишетъ о самоволномъ учении, яко ваше: «Всяк бо, аще призоветъ имя Господне, спасется. Како убо призовутъ, иже в него не вероваша? Какоже веруют, егоже не услышаша? И како услышат бес проповедающаго? И како проповедуют, аще не послани будутъ?»[588] А вы убо от кого послани, сице прелщаете человеки, развращающе истинну? А что еси писал о духовном куповании богатьства, и то везде отречено. А коли тебе что не потребова, а Писаниемъ веруеши, и ты о чемъ истинней вере не последствуеши?

А что описал еси о посте, и ты лжешь, а не истиньствуешь. Понеже убо и самъ Господь нашъ Исусъ Христосъ, егда убо абие взыде от воды и постився 40 дний и 40 нощи, победи плотнымъ божествомъ своимъ смотрением искусителя.[589] Сия же писа Матфей, Марко, Лука писа: самъ Господь ученикомъ своимъ рече, егда преобразися и сниде з горы, егда приведе ко учеником его человекъ из народа сына своего беснуема, и ученицы еще несовершени тогда бяху, благодати и Духа Святаго даръ не бяше прияли, и не возмогоша его изгнати; последи приводя беснуемаго ко Исусови, Исусъ же исцели его; ученицы же вопросиша его о семъ въ дому единаго, и рече им: «Сей род ничимъ изыти может, токмо молитвою и постом».[590] Сего ради и мы, християне, последствующе Владыце Господу нашему Исусу Христу, 40-ной постъ постимся, якоже онъ постился, и сего прилогающе къ его божественней страсти и воскресению.[591] Постъ же святыхъ апостолъ[592] по покою и по ослабе воздержанию виною постимся, паче и подъ запрещениемъ бывающих симъ способствуем. Постъ же пресвятыя Богородица,[593] яко матери всех, Владычице почесть приносимъ. Пост же пред Рождествомъ Христовымъ,[594] яко и святыхъ апостолъ постимся. Постъ вселетный, еже убо среда и пятокъ, постимся неложно за сего ради, яко в среду тварь на Господа всехъ славы убийству совет сотвори, в пятокъ же распят.[595] И сему убо овому дивящеся и Бога похваляюще, яко Спас человеческаго ради спасения до толико смотрениемъ сниде, иже за человекы пострада, ово скорбимъ и сетуемъ, яко тварь сицевая на Содетеля дерзну.

Множайше и твердейшая посты воздержания ради устроиша и порабощения телу. Якоже рече апостолъ Павелъ: «Аз убо тако теку, не воздухъ бию, но удержюся телу, порабощу е».[596] Сице убо и мы постимся, да удержимъ тела, и поработим е духови, и вся оправдания Господня приимемъ. Якоже убо воздуху дебелу сущи не может светло солнца видети, тако и плоти насыщенне паче примрачнаго облака заповедей Господнихъ невозможно разумети и праведнаго солнца Христа видети.

А что писалъ еси от Исайя пророка о постех, ино Господу нашему Исусу Христу во святомъ Евангелии глаголющу: «Горе вамъ, книжницы и фарисеи, лицемерии, яко одесятствуете мятву, и копръ, и кимень и остависте вящшее закону, суд, милость и веру. Вожди слепии, оцеждающеи комары, велбуды пожирающе».[597] Апостолу же Павлу глаголющу: «Не опивайтеся вина, в нем бо есть блуд и иная злая».[598] И аще убо истрезвится человекъ постомъ, тогда и вся дела благая восприимет, иже есть разрешение Писания долгу, и нужных изменении смырению, любви, согласию, милости, милостыни, нищекормьствию и прочимъ добродетелемъ. Не имущимъ поста ничто сего возможно сотворити. О Ионине посте и Аггееве, яко о Ниневии и прочии,[599] и сие убо подобна есть. Тако и Ахавъ Езавели ради Науфею постъ заповеда, и въ томъ посте уби его.[600] Якоже рече пророкъ Давыдъ: «Егда убиваше их, тогда взыскаху его, и возвращахуся, и утреневаху къ Богу. Помянуша, яко Богъ помощникъ имъ есть, и Богъ вышний избавитель имъ есть. Возлюбиша его усты своими, и языкомъ своимъ солгаша ему, и сердце ихъ не бе право с нимъ, ни уверишася въ завете его».[601] И ина многая обрящеши в Божественномъ Писании о семъ. А что писалъ еси, что апостолъ Павелъ писал къ Тимофею во обоих послании о ложных пророцехъ и о последнихъ прелестницехъ,[602] и тому всему вы последователи. Якоже рече апостолъ Павелъ въ техъже послании, яко «вете в сети дияволи, живи уловлении от него в того волю»,[603] и прочая, якоже тамо пишет. Сия убо дозде.

А что еси писалъ о молитве, что святых на помощь не призываешь и литоргии не слушаешь, и о томъ писано выше того много, а ныне вмале изреку ти. Аще бы еси на основании Христове и апостолскомъ назидании былъ, и во ограде священныхъ учений былъ словесная овца, ничесоже бы еси апостолскихъ повелений разрушал. Аще ли разрушаеши, не токмо козлище еси, но хищникъ и волкъ, тать и разбойникъ. И яко речено есть во Евангелии: «Яко прелазя преграду, той тать есть и разбойникъ».[604] Якоже Громовъ сынъ глаголетъ: «Изыдоша от нас, но не беша от насъ; аще убо быша были от нас, пребыша убо были с нами».[605] И паки наводит, глаголя: «Не пребываяй во учении Христове, Бога не имать, и се есть Антихристовъ».[606] Памятуй то, и яко в Луце речено есть: «Отметаяйся апостолъ, Христа отметается».[607] И есть в Матфее писано: «Иже Господу Богу поклонишися и тому единому послужиши».[608] То рече Господь ко дияволу. О апостолехъ и о всех святых, како подобаетъ имъ молитися, выше написахомъ.

О литоргии подлинно во Евангелии написано есть. По семъ священныи апостолы уставиша молитвы, и святыя отца, како литоргию сотворити. Или мниши, яко просто хлебъ и вино? Како убо воспоминати смерть Господню, аще литоргия не сотворяти? Апостолъ убо Павелъ, къ коринъфомъ пиша, глаголетъ: «Аз убо прияхъ от Господа и предах вамъ, яко Господь Исусъ въ нощь, в нюже предан бываше, прия хлеб, благодаривъ, преломивъ, рече: „Приимете и ядите. Се есть тело мое, еже за вы ломимое. Се творите в мое воспоминание". Тако и чашу по вечери, глаголя: "Сия чаша Новый Завет есть о моей крови. Се творите, елико аще пиете, в мое воспоминание. Елико аще ясте хлебъ сей и чашу сию пиете, смерть Господню возвещаете"».[609] И Господу нашему Исусу Христу глаголющу, егда на божественней своей страсти возлегъ со обеманадесять ученикома своима и рече къ нимъ: «И приемъ хлебъ, хвалу воздавъ, преломи, дасть имъ, глаголя: "Се есть тело мое, и за вы даемое; се творите в мое воспоминание". Такоже и чашу по вечери, глаголя: "Сия чаша Новый Завет есть моею кровию, еже за вы проливается"».[610] Сия убо в Луце, Матфей и Марко глаголетъ: «Се есть кровь моя Новаго Завета, еже за многия изливаема во оставление греховъ».[611] Смотри сего, како воспоминание Господне сотворити, аще литоргии несть? Паче убо самъ, научая учениковъ своихъ и апостоловъ молитву сотворяти, самъ воздая хвалу Богу и Отцу, якоже при Лазори, тако и зде. И сего ради убо, аще ли кто литоргия не совершает, тот смерти Господни не возвещаетъ, и се есть Антихристъ и развратникъ вере Христове. Избранному же сосуду апостолу Павлу глаголющу: «Вся кровию очищаются по закону, без кровопролития не бывает оставление. Но в них воспоминание грехомъ на коеждо лето, невозможно бо крови юнчей и козлей отпущати грехи». Тогда рече: «Се прииду сотворити волю твою, Боже. Отъемлетъ 1, еда 2 поставит. О нейже воли освящени есми и приношениемъ тела Исусъ Христова единова».[612] Видиши ли, како о литоргии пиша, глаголет, яко подобает ю творити и послушати? Не хотящимъ сего сотворити таково запрещение полагаетъ, глаголя: «Волею бо согрешающимъ намъ, по приятию разума истинне, к тому о гресехъ не обретается жертва. Страшьно чаяние суда и огня зависть, поясти хотя противныя. Отвергся кто Закона Моисеова, без милосердия при двою или триех свидетелей умираетъ. Колицей, мнитца, сподобитися горцей муце, иже Сына Божия поправ и кровь заветную просту непщева, в нейже освятися, и Духъ благодати укоривъ? Вемы бо рекшаго: Мне отмщение, аз воздамъ — глаголеть Господь».[613] Сия убо дозде.

Се часто поминаешь о ходатайстве Исус Христове. И ты слыши: ходатайство Господа нашего Исуса Христа се есть и божественных его ученикъ, и апостолъ, и святыхъ отецъ. Ходатайство Господа нашего Исуса Христа се есть, якоже писано в Бытийсках книгах:[614] искони сотвори Богъ небо и землю, видимая вся и невидимая, последи же Адама и Евву, и заповедь положи ему. Оному преступльшу заповедь, изгнанъ бысть ис породы райския и осуженъ смертию и тяжестию плоти. Раю приставлени бысть херувими, с пламенным оружиемъ стрегущии врат Едемскых, да никто входит во нь. Не мни убо се, яко противникъ кто Богу есть и властию похитити райское селение, но ради сего приставлено бысть пламенное оружие, возвещая гневание Божие к человекомъ. И оттоле царствоваше смерть и грех человекомъ, на несогрещихъ, от Адама до Ноя, от Ноя до Авраама, от Авраама до Моисея, от Моисея до Христова воплощения. Якоже рече Павелъ, ко евреом пиша, глаголетъ: «Святии вси, иже верою победиша царствия», и прочая, — «И си вси послушествовани верою, не прияша обетования, Богу о насъ лучшее что прозревшу, да не без нас совершени будутъ».[615] Понеже бо до Христова пришествия, аще и праведнии непорочни бяху кои обретаеми, но обаче осужениемъ адамовымъ вси умираху и во ад схожаху. И видевъ Богъ создание свое, от диявола мучимо, и милосердова — посла Сына своего воплотитися от пречистыя присно Девы Мария на спасение человекомъ. Якоже рече избранный апостолъ Павел: «Посла Богъ Сына своего единороднаго, ражающася от жены, бывающа под закономъ, да подзаконныя искупит, да всыновление приимемъ».[616] И паки, ко евреомъ пиша, глаголетъ: «Имуще убо, о братие, дерзъновение вход святых кровию Исус Христовою, и обнови нам путь новъ завесою, сииречь плотию своею, и святителя велика на дому Божии».[617]

Сие убо ходатайство Господа нашего Исуса Христа. Яко речено бысть в Луце о рождестве Господа нашего Исуса Христа: «Внезапу бысть со аггеломъ множество вой небесных, хвалящих Бога и глаголющихъ: Слава в вышнихъ Богу и на земли мир, во человецех благоволение».[618] Понеже гнев Божий и вражда, на человецхъ пребывая от Адама и до воплощения Христова, Христовымъ божественнымъ плотнымъ смотрениемъ вся сия разрушися: и смерть, и грех, и дияволя держава. Самовластни быша человецы Христовою благодатию и научени, како подобает побеждати князя тмы века сего и миродержителя. И волю Божию совершивъ, и о божественемъ его слове содействомъ Святаго Духа и Царства Небеснаго наследницы будем. Самоволно не приемлющи заповеди Христовы и самовластно диаволу покарящеся снидутъ въ муку вечную; понеже бо до Христова пришествия и неволею, аще и праведни бяху, но ради Божия гнева и проклятия Адамля дияволъ область имяше, и душа ихъ во адъ сводяшеся. Исус Христос, пришед, воплощениемъ своимъ, и распятиемъ, и воскресениемъ сию клятву разруши, бывъ по насъ клятва, и миръ Божий давъ человекомъ, и древний гневъ разори, еже о Адаме, и дияволю дрьжаву разруши, и самовластна человека сотвори, якоже и Адамъ бысть преже преступления, творити добро и зло. Якоже рече апостолъ Павелъ, пиша к римляномъ: «Слава, и честь, и миръ всякому делающему благое. Повинующимся неправде — ярость, гневъ. Скорбь, теснота на всякой души человека, творящаго злое».[619] И научи Господь нашъ Исус Христос, како подобает заповеди его, Отца и Святаго Духа совершати и Царствию Небесному наследникомъ быти. И се, егда возношашеся на небеса, предасть божественнымъ своимъ ученикомъ и апостоломъ, посылая ихъ на проповедь и повелевая к тому иныхъ научити.